Министерот Димитров е воздржан во однос на измените, предложени од двајца пратеници, кои се во скратена постапка и со кои се предвидува отстранување на сегашното решение според кое лица со двојно државјанство не можат да бидат амбасадори
Новиот закон за надворешни работи, најверојатно, ќе го носи новиот парламентарен состав, со оглед на тоа што овој парламент е пред распуштање.
Шефот на дипломатијата Никола Димитров информира дека пратеници имаат поднесено измени на законот за надворешни работи, по скратена постапка, што него, како што рече, му создава нелагодност и воздржаност. Предлог- измените се поднесени од пратениците Артан Груби (ДУИ) и јулијана Николовска (ЛДП) и предвидуваат само промена на одредбата според која лица со двојно државјанство не може да бидат амбасадори. Предлог-измените се на дневен ред на утрешната седница на Комисијата за надворешни работи во парламентот.
„Тоа е еден сериозен закон, којправи големи чекори напред. И покрај тоа што имав поддршка од Европската делегација, пресековме да не ставаме европско знаменце, да не бараме скратена постапка, бидејќи мислам дека новите решенија во законот треба да поминат низ една голема и суштинска дебата и во Комисијата и во Собранието. Во меѓувреме има предлог од група пратеници за измена на стариот закон само во еден сегмент. Содржината на предлог-измената е на линија на новиот предлог-закон за надворешни работи. Она што мене ми прави нелагодност е што измената е предложена во скратена постапка и затоа сум воздржан“,
рече Димитров.
Тој рече дека министерството нема да прати ниту еден амбасадор кој не ги исполнува важечките прописи од актуелниот Закон за надворешни работи. Кандидатите кои имаат двојно државјанство се условно усогласени, така што, како што вели, нема да може, ако остане актуелниот закон, да бидат упатени на функцијата се додека имаат двојно државјанство.