Лидерите на СДСМ, на ВМРО-ДПМНЕ и на ДУИ попладнево ќе одржат состаноци на кои Христијан Мицкоски ќе ги консултира Зоран Заев и Али Ахмети за предлог-кандидатот за министер за внатрешни работи во техничката влада. Во 16 часот Мицкоски ќе се сретне со Ахмети, а во 17 часот и со Заев, по што се очекува да се знае името на новиот шеф на МВР.
Законот предвидува во Владата за спроведување на изборите, која се формира 100 дена пред гласањето, министерот за внатрешни работи да дојде на предлог на опозициската партија со најголем број пратеници во Собранието, во случајот ВМРО-ДПМНЕ.
Притоа, Законот вели дека за решението за МВР, ВМРО-ДПМНЕ претходно треба да се консултира со двете партии со најголем број пратеници – СДСМ и ДУИ.
Лидерот на СДСМ синоќа рече дека нема бланко поддршка за кое било решение од ВМРО-ДПМНЕ.
-Јас имам принципи и критериуми за предлози, водејќи се, пред се, од правната држава и принципи досега поставени од Социјалдемократскиот сојуз и, секако, нема да ги соопштам јавно. Утре ќе ги поставам на маса и верувам дека и најголемата опозициона партија ќе води грижа токму за тие принципи, заради тоа што не е само министерот за внатрешни работи туку Оливер Спасовски и Социјалдемократскиот сојуз на Македонија и тој треба на крајот да даде предлог и не е се исто каков предлог како овластен предлагач давате. Заради тоа што кога давате предлог застанувате зад него. Веројатно тие знаат како е најдобро за нив како најдобро ќе ја извршат улогата, но секако не значи дека секој еден може да биде кандидат за министер или за дополнителен заменик-министер, изјави Заев.
Освен министри за внатрешни работи и за труд и социјална политика, ВМРО-ДПМНЕ во техничката влада ќе има и дополнителни заменици-министри во три ресори: финансии, земјоделство и информатичко општество.
Извршниот и Централниот комитет на партијата му дадоа мандат на лидерот Христијан Мицкоски да ги предложи кандидатите за членови на Владата за спроведување на изборите.
СДСМ ги потврди своите кадри
Владејачкиот СДСМ синоќа на седници на Извршниот и на Централниот одбор одлучи премиер на техничката влада да биде Оливер Спасовски, а вицепремиер за економски прашања, поради заминувањето на Кочо Анѓушев, да биде Мила Царовска, која во ресорот труд ќе му отстапи место на кадар на ВМРО-ДПМНЕ.
Дополнителни заменик-министерки во МВР и во труд и социјала, на предлог на СДСМ, ќе биде шефиците на кабинетите на Спасовски и на Царовска – Славјанка Петровска и Санела Шкријељ.
Што предвидува пржинската формула?
Законот за Влада предвидува дека министерот и дополнителниот заменик-министер во техничката влада заедно и рамноправно ги потпишуваат сите акти и документи што „се однесуваат на правните, финансиските и кадровските прашања поврзани со организацијата на изборите“. Отсуството на потпис на едниот од нив значи дека актот не произведува правно дејство.
Во случај на несогласување меѓу министерот и дополнителниот заменик-министер за тоа дали одредено правно, финансиско и кадровско прашање се однесува на организација на изборите, Државната изборна комисија (ДИК) е должна да донесе одлука во рок од 24 часа. Одлуката на ДИК е конечна.