Доста ни е од изговори. Бараме почит за новинарската професија, за сите нас. Никој не смее да нè потценува и навредува затоа што на крајот од денот работиме за граѓаните и за јавниот интерес. Новинарството е јавно добро кое не им припаѓа ниту на Владата, ниту на опозицијата, ниту на партиите, ниту на газдите на медиумите. Им припаѓа на новинарите и новинарките, изјави претседателот на ЗНМ
Нападите врз новинарите и медиумските работници се напад врз јавноста, односно врз правото на граѓаните да бидат информирани. Го поздравуваме донесувањето на измените на Кривичниот законик со кои се предвидува нападот врз новинарите и медиумските работници да се третира како напад врз службено лице, но предупредуваме дека соодветна и доследна примена на овој закон е она што нас не интересира и она што на крајот ќе се мери, истакна претседателот на ССНМ
Законите важни за медиумите не се спроведуваат, јавните функционери имаат потценувачки однос кон новинарите и снимателите, државниот пи-ар ја зема работата на новинарите, снимателите, фоторепортерите. Владата создаде најголема редакција во земјата. Локалните и регионалните медиуми работат на раб на издржување, безбедноста на новинарите не е на ниво на кое треба да биде. Вака веќе не може, порача на денешниот протестен марш на новинарите и медиумските работници, претседателот на Здружението на новинари (ЗНМ) Младен Чадиковски.
„Работите тапкаат во место, а дури и се влошуваат. Државните институции и нивните директори имаат проблем да сфатат дека не е транспарентост кога со денови чекате одговор, а добивате пи-ар памфлет за објава. Некој ме праша деновиве: Што ви текна да протестирате кога немате затворени или не дај Боже убиени новинари. А и слободата на говор е подобра денес отколку што беше пред неколку години? Му одговорив: Така е, прав си. Но, излегуваме на протестен марш за да спречиме можност тенденциите кои ги набројав претходно утре да ни се преточат во нешто многу полошо. Да превенираме работите да не отидат во неврат и да ја испратиме пораката: Тука сме, може да разговараме, ама имаме сериозни барања до Владата и до парламентот“,
истакна Чадиковски.
Барањата на новинарите и на медиумските работници се:
– Стоп за негативниот тренд на понижувачки говор од страна на министри, директори, политичари;
– Стоп за агресивниот државен пи-ар што ја зема работата на новинарите, а државните институции ги претвора во потемкиново село за очите на јавноста;
– Поддршка за колегите од внатрешноста во насока на изнаоѓање системско решение за квалитетна новинарска содржина и достоинствени плати;
– Обезбедување услови за квалитетни професионални новинарски продукти за традиционалите, но и новите медиуми;
– Имплементација на законите што се важни во новинарската сфера за обезбедување и независно функционално работење на јавниот сервис и на регулаторот;
– Брза и ефикасна имплементација на законите што ја третираат безбедноста на новинарите.
За сите овие барања, како што рече Чадиковски, до Владата доставиле акциски план со точки, потточки и рокови за реализација.
„Доста ни е од изговори. Бараме почит за новинарската професија, за сите нас. Никој не смее да нè потценува и навредува затоа што на крајот од денот работиме за граѓаните и за јавниот интерес. Новинарството е јавно добро кое не им припаѓа ниту на Владата, ниту на опозицијата, ниту на партиите, ниту на газдите на медиумите. Им припаѓа на новинарите и новинарките“,
изјави претседателот на ЗНМ.
Претседателот на Самостојниот синдикат на новинари и медиумски работници (ССНМ), Павле Беловски, посочи дека новинарите и медиумските работници се повеќе се шиканирани, напаѓани, навредувани, тепани и газени.
„Тој наратив потекнува од повеќе извори, но за жал забележуваме дека и високи политички функционери си дозволуваат да навредуваат и омаловажуваат. Сметаме дека оваа ситуација мора да сопре. Нападите врз новинарите и медиумските работници се напад врз јавноста, односно врз правото на граѓаните да бидат информирани. Го поздравуваме донесувањето на измените на Кривичниот закон со кои се предвидува нападот врз новинарите и медиумските работници да се третира како напад врз службено лице, но предупредуваме дека соодветна и доследна примена на овој закон е она што нас не интересира и она што на крајот ќе се мери“,
нагласи Беловски.
Тој рече дека една од причините за денешниот протест е и лошата состојба во која се наоѓаат новинарите и медиумските работници од локалните медиуми.
„Тие работат во навистина тешки услови, со се помалку кадар, со ниски плати, и нивната социо-економска состојба е незавидна. Затоа и се повеќе се чувствува недостигот на локални теми, на известувања од локалните заедници што претставува сериозен недостиг во една демократија. Сметаме дека е повеќе од итно да се донесат решенија за подобрување на состојбата во која се наоѓаат новинарите и медиумските работници од внатрешноста. Решенија кои ќе бидат системски, законски, а не парцијални. Решенија со кои работодавците ќе добијат квалитет, а нашите колеги сигурност. Бараме услови, а не милостина“,
рече Беловски.
Тој се осврна и на работничките права на новинарите и медиумските работници кои, според него, не се почитуваат.
„За жал, сведоци сме дека работничките права, дури и оние најосновните во значителен дел од медиумите не се почитуваат. Не се препознаваат, се прескокнуваат. За тоа секако одговорност имаат и надлежните институции. Мораме заедно и сплотени како што сме и на овој марш да продолжиме да ги бараме и да се бориме за она што ни следува според законот за работни односи, а истовремено ги охрабруваме и сопствениците на медиумите да не се плашат од синдикатот, да не се плашат од организирање на работниците и укажуваме дека овие состојби може да се подобрат пред се со потпишување на колективни договори со што далеку попрецизно ќе се утврдат условите за работа, како и обврските и задолженијата на двете страни. Дијалог со сите и победа за сите“,
рече претседателот на ССНМ.