Протестот започна од пред зградата на Владата, а новинарите маршираа до Собранието изразувајќи незадоволството од нападите врз новинарите, навредите и понижувањата од политичарите
„Новинарството на удар, ние сме обединети”, „Нема да молчиме”, „Сиромаштија = самоцензура”, се дел од пораките што новинарите денеска ги испраќаат на протестен марш од пред Владата до Собранието.
Протестот го организираат Здружението на новинари и Самостојниот синдикат на новинари и медиумски работници поради незадоволството од нападите врз новинарите, навредите и понижувањата од политичарите, нелојалната конкуренција, небезбедни услови во кои работат новинарите и медиумските работници и лошата социо-економска состојба.
Според претседателот на Здружението на новинарите на Македонија, Младен Чадиковски, законите што се важни за медиумите не се спроведуваат, јавните функционери имаат потценувачки однос кон новинарите и снимателите и затоа чувствуваме дека работите тапкаат во место, дури и се влошуваат.
Според него, јавните функционери и денес знаат да имаат потценувачки однос кон новинарите и снимателите, агресивниот државен пи-ар ја зема работата на новинарите, локалните и регионални медиуми работат на раб на издржување, а безбедноста на новинарите не е на ниво на кое би сакале да биде.
„Пред сè, носителите на јавни функции и политичарите треба да сфатат дека не смеат да нè игнорираат или потценуваат. Не заради нас, туку заради граѓаните и јавноста која ние ја претставуваме“,
порачува Чадиковски.
Според претседателот на ЗНМ, новинарството минува низ сериозни трансформации во последниве години кои ги диктираат новите технологии.
Поддршка на ЗНМ за маршот за одбрана на новинарското достоинство упати „Сејф џурналистс“, мрежата која претставува повеќе од 8 200 медиумски професионалци на Западен Балкан. Во заедничко соопштение поддршка за маршот и честитки за 77-годишнинатата до ЗНМ, кое е членка на оваа мрежа, изразија здруженијата на новинари на Косово, Босна и Херцеговина, Хрватска, Србија, како и Синдикатот на медиуми на Црна Гора.