Со одлуката на Регулаторната комисија се врши зголемување на малопродажните цени на нафтените деривати во просек за 2,29 отсто, а освен кај дизелот и бензините, од полноќ поскапување ќе има и кај екстра лесното масло и мазутот
Од полноќ цената на дизелот се зголемува за еден денар за литар, а бензините поскапуваат за 2,5 денари за литар, одлучи денеска Регулаторната комисија за енергетика и водни услуги (РКЕ).
Со одлуката се врши зголемување на малопродажните цени на нафтените деривати во просек за 2,29 отсто, па така, новата малопродажна цена на еуросупер БС-95 ќе изнесува 84 денари за литар, еуросупер БС-98 ќе се продава за 86 денари за литар, а еуродизел (Д-Е V) за 85,5 денари за литар.
Освен бензините и дизелот, поскапување за 1,5 денари за литар има и кај екстра лесното масло за домаќинство (ЕЛ-1), и ќе изнесува 84 денари за литар. Со одлуката на РКЕ за 1,226 денари за килограм се зголемува и малопродажната цена на мазутот М-1 НС и сега ќе се продава за 52,825 денари.
Како причина за зголемувањето на малопродажната цена на нафтените деривати од РКЕ ги посочуваат зголемените референтни цени на светскиот пазар кај бензините во просек за 1,579 отсто и намалените кај дизелот во просек за 1,059 отсто, како и за 0,082 отсто понискиот курс на доларот во однос на денарот.