Бројот на новозаболени, во споредба со претходната седмица, е зголемен за 12,3 отсто
Нови 64 случаи на ковид-19 се регистрирани во земјава изминатата недела, во периодот од 16 до 22 септември, што е зголемување од 12,3 отсто во споредба со претходната седмица.
Најголем дел од новозаразените, или вкупно 42, се во Скопје, а најголема инциденца е регистрирана во Пехчево, се наведува во најновиот извештај од Институтот за јавно здравје (ИЈЗ).
Новозаболените се од сите возрасни групи, а најголем дел на возраст над 60 години.
Во овој период пријавено е едно починато лице од Тетово кое било на возраст над 65 години. Во извештајот на ИЈЗ се наведува дека лицето пред три години ја примило втората доза од вакцината против ковид-19. Лицето било со регистрирани коморбидитети и е починато во болнички услови.
Во текот на оваа година, заклучно со 22 септември, во земјава се регистрирани 1 624 заболени и 21 починато лице со ковид-19.