Нема да има ново одлагање на усвојувањето на новата методологија за начинот на кој ќе се водат преговорите за членство во ЕУ со земјите кандидати, како што е Северна Македонија. Колеџот на комесари (Европската комисија), под претседателство на Урсула фон дер Лејен, се очекува в среда (5 февруари) да го усвои документот, што ќе биде прв чекор кон можно кревање на рампата за Скопје и Тирана во пристапниот процес, најавува дипломатски извор. Претходно, од Брисел стигаа информации за можно усвојување на методологијата следната недела, по 10 февруари.
По утврдувањето од Европската комисија в среда, методологијата ќе биде испратена на консултации во телата на Европската Унија во кои главниот збор го имаат државите членки. Тоа не значи и дека земјите членки допрва ќе се запознаваат со нејзината содржина, особено не најзаинтересираните, како Франција, бидејќи еврокомесарот Оливер Вархеји и неговиот тим прашувале за мислење во главните градови уште во текот на изработката на документот, вели изворот на „360 степени“. Впрочем, иницијација на реформирањето на методологијата беше нон-пејперот од Франција, кој беше промовиран во ноември минатата година.
Откако документот ќе ги помине сите скалила и работни тела во Советот на ЕУ, планот е за него формално, со заклучоци, да се произнесе Советот за општи работи на ЕУ на состанокот закажан за 24 март. Тоа би се случило два дена пред состанокот на Европскиот совет (26 и 27 март) од кој, според најавите, би можела да се очекува дискусија за натамошното проширување на ЕУ, а во најдобра варијанта и одлука за почеток на пристапни преговори со Северна Македонија и со Албанија.
Паралелно со процесот на одобрување на новата методологија, Европската комисија до крајот на овој месец би требало да излезе со мини-извештаи за реформскиот напредок на двете држави кандидатки кои се надеваат на старт на процесот на пристапување кон ЕУ.
Клемен Боне, советник за европски прашања на Емануел Макрон, вели дека Франција сака да се повлече од блокадата на почетокот на преговорите со Северна Македонија и Албанија, веднаш штом се постигне единство околу реформата, објавува германски „Франкфуртер алгемајне цајтунг“ (ФАЦ). Притоа, Боне вели дека Франција сака одлука за Скопје и Тирана во пакет.
„Ќе се спротивставиме на тоа Северна Македонија и Албанија да бидат третирани одделно. Тоа ќе биде спротивно на нашата желба да се поттикне стабилноста на регионот“, вели советникот на Макрон во интервју за ФАЦ.
Моншалан: Рано е за конечен став на Франција
Француската државна секретарка за европски прашања, Амели де Моншалан, на прес–конференција во Брисел изрази увереност дека методологијата што ќе ја објави Европската комисија в среда ќе биде задоволителна за Франција, но сѐ уште не гарантира отворање на преговорите со Северна Македонија и со Албанија во март, јави дописникот на МИА.
Франција инсистира новата методологија да вклучува четири клучни принципи: реверзибилност, политичко управување со процесот, постепеност и конкретност. Според дипломатите во Брисел кои се запознаени со нацртот на ЕК, овие барања на Париз ќе бидат задоволени.
Француската државна секретарка за европски работи денеска рече дека не може да каже која ќе биде позицијата на Франција сѐ додека не се објави реформата на процесот, како и извештајот на Европската комисија за реформите во земјите.
„Треба да има договор меѓу земјите членки, да биде одобрено, да се осигуриме дека во извештајот на ЕК во март дава позитивна дијагноза и да има вистински економски патоказ, а не судски и административен монопол во регион во кој сакаме да тежиме, мора да има конкретни економски предлози, инаку зборуваме за политика на сигнал како што ја нарекувам за да се чувствуваме добро морално“, рече Моншалан на прашање на МИА дали Франција ќе даде зелено светло за преговори доколку методологијата е задоволителна за Париз.
Моншален рече дека очекува „да има отворена дискусија со другите земји членки на оваа тема и да го види извештајот на Европската Комисија за реформите“, додавајќи дека „нема автоматизам“.
„Претседателот Макрон во октомври рече дека не дава мандат за почеток на преговори кои не носат конкретни бенефити, оваа позиција нема да се смени, ако немаме увереност за исходот не гледам зошто би смениле став, за да смениме став треба рамката да еволуира, да има реформа во рамките на мандатот за преговори“, додаде таа.