Денеска е Меѓународниот ден на знаковниот јазик
„Да нѐ слушнат и да ги слушнеме сите припадници на нашата заедница“, со ваква порака денеска се одбележува Меѓународниот ден на знаковниот јазик.
Обединетите нации кон крајот на 2017 година го прогласија 23 септември како ден за подигање на свеста за значењето на знаковниот јазик како човеково право на глувите лица.
Тоа утврдува дека пристапот до знаковниот јазик и услугите на знаковен јазик, вклучително и квалитетно образование, е од витално значење за растот и развојот на глувото лице и ја препознава важноста на зачувување на знаковните јазици како дел од јазичната и културната разновидност.
Конвенцијата за правата на лицата со попреченост ја признава и ја промовира употребата на знаковните јазици, со што тие се еднакви во статусот на говорните јазици и ги обврзуваат државите да го олеснат учењето на знаковниот јазик и да го промовираат лингвистичкиот идентитет на глувите заедници.
Во светот има околу 72 милиони глуви, од кои повеќе од 80% од нив живеат во земјите во развој. Тие користат повеќе од 300 различни знаковни јазици. Но постои и меѓународен знаковен јазик, кој го користат глувите лица на меѓународни состаноци и неформално, кога патуваат и се дружат.
Во нашата земја се користи македонскиот знаковен јазик, како јазичен систем за комуникација на глувите и наглувите лица. Македонската знаковна азбука може да биде изведена со една или со две раце, движења на главата, фацијална експресија, движење на устата и со движење на телото. Точната бројка на корисници на овој јазик не е сосема позната, но се проценува дека е над 6 000 лица.
Неговата употреба е регулирана со Законот за употреба на знаковниот јазик од 2009 година, според кој секоја државна и општествена установа е должна да обезбеди толкувач на знаковен јазик ако одредено лице има таква потреба. Обука за изучување на знаковниот јазик во Македонија врши Сојузот на глуви и наглуви на Македонија и Институт за дефектологија во Скопје. Толкувачите што ја поминале обуката се стекнуваат со сертификат за овластен толкувач. Според некои податоци, во моментов во земјава има околу 30 лиценцирани и сертифицирани толкувачи.