Отворена е и темата за зголемување на инвестициите во различни сектори, како инвестициите во обновливи извори на енергија, управување со отпад и пречистителни станици и инвестиции во производствени капацитети, соопштија од кабинетот на вицепремиерот
Вицепремиерот за борба против корупцијата, одржлив развој и човечки ресурси,Љупчо Николовски, овие три дена ја предводи владината делегација во официјалната посета на Меѓународниот економски форум во Санкт Петербург, Русија, соопштија од неговиот кабинет.
Во состав на делегацијата од Северна Македонија учествува и извршниот директор на македонско-руската Стопанска комора, Дејан Бешлиев.
Во рамки на Меѓународниот економски форум во Санкт Петербург, Николовски, како што се соопштува, имал работни средби со копретседателот од руската страна на Меѓувладината македонско-руска комисија за трговско-екононска и научно техничка соработка Алексеј В. Груздев и со заменикот-министер за земјоделство на Руската Федерација, Сергеј Левин.
Николовски, како копретседател на Меѓувладината македонско-руска комисија за трговско-економска и научно-техничка соработка, на средбата со Груздев, разговарал за зголемување на соработката во областа на туризмот и унапредување на трговската размена. Воедно, отворена е и темата за зголемување на инвестициите во различни сектори, меѓу кои како најзначајни се потенцирани инвестициите во обновливи извори на енергија, управување со отпад и пречистителни станици и инвестиции во производствени капацитети.
Како што се наведува во соопштението од кабинетот на Николовски, Руската Федерација е еден од стратешките трговски партнери на Северна Македонија во делот на извозот на македонски земјоделски производи.
На средбата со заменик-министерот Левин се дискутирало за можностите за зацврстување и проширување на билатералната соработка во земјоделството и зголемување на трговската размена помеѓу Северна Македонија и Русија.
„Вицепремиерот Николовски и рускиот заменик-министер за земјоделство Левин ја потврдија досегашната соработката помеѓу двете држави и ја потенцираа потребата од продлабочување и зајакнување на соработката во земјоделскиот сектор, преку организирање бизнис форум помеѓу компании од двете земји, отворање откупни центри во повеќе региони и соработка помеѓу инспекциските служби за полесен извоз на македонски производи во Руската Федерација,“
информираат од кабинетот на вицепремиерот.
Во текот на денешниот ден, Николовски ќе присуствува на панел дискусија во рамки на Меѓународниот економски форум на тема „Односите на Руската Федерација и ЕУ – одговор на предизвиците од денешницата“.
Економскиот форум во Санкт Петербург, како што се наведува во информацијата за учеството на Николовски, е уникатен настан во светот на бизнисот и економијата и се одржува од 1997 година. Од 2006 година се одржува под покровителство на претседателот на Руската Федерација. Во текот на последните 24 години, Форумот е водечка глобална платформа за членовите на деловната заедница да се состанат и да разговараат за клучните економски прашања со кои се соочува Русија, пазарите во развој и целиот свет. Деловната програма на годинешниот Меѓународен економски форум, ќе се фокусира на глобалните и руските економии, социјалните теми и технолошкиот развој.