ЕУ е нашиот главен трговски партнер, со 77,5 отсто од извозот на земјата и 51 отсто од нејзиниот увоз. Дополнително, ЕУ е наш најголем финансиски поддржувач, донатор и кредитор во сите области, таа ни помага во европеизирањето на македонскиот бизнис-модел. Блокадата од страна на ДПМНЕ може да ја чини нашата земја 10 милијарди евра помалку фондови од ЕУ, изјави пратеничката на СДСМ
Со блокадата на уставните измени, ВМРО-ДПМНЕ и Христијан Мицкоски, не само што ја оддалечуваат државата од европскиот пат туку негативно влијаат и врз економскиот развој, реагираат од СДСМ.
„ЕУ е нашиот главен трговски партнер, со 77,5 отсто од извозот на земјата и 51 отсто од нејзиниот увоз. Дополнително, ЕУ е наш најголем финансиски поддржувач, донатор и кредитор во сите области, таа ни помага во европеизирањето на македонскиот бизнис-модел. Блокадата од страна на ДПМНЕ може да ја чини нашата земја 10 милијарди евра помалку фондови од ЕУ“,
изјави на денешната прес-конференција Даниела Николова, пратеничка на СДСМ.
Таа потсети дека само во досегашниот евроинтегративен процес на земјата, преку ИПА, грантови за енергетската криза, макроекономска помош, поддршка за малите и средните компании, помошта за ублажување на економските последици од пандемијата, образовните и други програми, во државата се слеале над 1,2 милијарда евра од европските фондови. Во иднина, додаде Николова, преку забрзување на евроинтеграциите и полноправното членство, програмите и фондовите на ЕУ можат да бидат 11 пати повисоки од оние што досега ги имаме.
„Но, блокадите на ДПМНЕ и Мицкоски можат да доведат до загуба на овие значајни финансиски можности за државата, бизнисот и граѓаните. Мицкоски и ДПМНЕ исто така, ја ускратуваат шансата за голем скок на платите и раст на животниот стандард на граѓаните, со оглед на фактот што, во првите пет години по зачленувањето во ЕУ, растот на платите во земјите членки на ЕУ се движеше од над 50 отсто, па сè до 100 отсто. Првите пет години по членството, кај државите од ЕУ, стапките на раст на БДП се зголемиле од 80 до 90 отсто, но во случај на прекин на интеграциските процеси, тие стапки за нашата држава може да останат недостижни, исто како и пристапот на македонските компании на европскиот пазар со 500 милиони“,
изјави Николова.
Придобивките од членството во ЕУ се огромни, сега имаме единствена можност, отворена врата за европскиот пат и оваа шанса треба да се искористи, затоа што 80 отсто од граѓаните јасно се определени за членство во ЕУ, децидни се од владејачката партија.
Лидерот на ВМРО-ДПМНЕ, Христијан Мицкоски, синоќа во Кичево го повтори партискиот став дека нема да поддржат уставни измени под бугарски диктат и најави дека на следните парламентарни избори, кога и да се случат, неговата партија ќе направи историски резултат.
Денеска Европа, светот прават стратегија како да ја скршат ВМРО-ДПМНЕ и овие 44 да изгласаат предавнички уставни измени во парламентот скроени по бугарски диктат. Мора да се обединиме, да застанеме околу заедничката цел, а тоа е огромна победа на следните избори, силни реформи и Македонија онаква каква што сите ние си ја сакаме, и децата дома да ни останат,
рече Мицкоски.