Потпретседателот на ВМРО-ДПМНЕ и пратеник Александар Николоски обвини дека власта продолжува да склучува скандалозни договори со кои милионски суми се слеваат во приватни џебови од државни тендери. Тој на денешната прес-конференција објави дека РЕК „Битола“ склучила договор со фирмата „Марковски компани“ вреден 9,2 милиони евра.
„Пред вас презентирам договор кој во суштина е рамковна спогодба за ангажирање на 10 булдожери гасеничари од ’Марковски компани’ кои треба да бидат ангажирани во РЕК ‘Битола’ во период од 18 месеци по замислете неверојатни 16.253 денари по час. Повторувам 16.253 денари по час или вкупната вредност на оваа рамковна спогодба е 9 милиони и 200 илјади евра кои ’Марковски компани’ треба да ги добие за ангажирање на само 10 булдожери гасеничари во рамките на РЕК ‘Битола’“,
рече Николоски.
Според Николоски, фирмата со овој договор за само еден ден од РЕК „Битола“ ќе наплаќа 6.300 евра, или за сите 10 булдожери ќе наплаќа 63.000 евра.
„Колку нови булдожери може да се купат со договор од 9,2 милиони евра и тие да бидат во сопственост на државата, а не на омилената приватна компанија? Дали можеби можат да се купат 15 или 20 булдожери кои ќе бидат во сопственост на државата, а не во сопственост на ’Марковски компани’? Кој поединец, кој граѓанин заработува по 16.253 денари за работа за само еден час или 6.300 евра дневно? Ова го нема никаде! Кој заработува 6.300 евра дневно или 253 евра по час за сопствената работа, дали има втор случај во Македонија или во регионот или во Европа со вакви цени?“,
вели Николоски.
Николоски смета дека ваков договор треба да е предмет на опсервација и на проверка од обвинителството и сите надлежни институции.