Потпретседателот на ВМРО-ДПМНЕ Александар Николоски кажа дека дел од постапката за одобрување на заем од 100 милиони евра од ЕБОР, кој како што рече, владата го крие, е и потпишување договор за деактивирање на ТЕЦ Осломеј и РЕК Битола и стопирање на активностите во овие термоелектрани до крајот на 2023, односно до крајот на 2027 година
Владата има намера да земе кредит од 100 милиони евра од Европската банка за обнова и развој (ЕБОР), а тоа би значело затворање на ТЕЦ Осломеј и РЕК Битола заклучно со 2027 година. Ова во своето гостување во емисијата „Само вистина“ на Канал 5 вечерва го кажа потпретседателот на опозициската ВМРО-ДПМНЕ, Александар Николоски кој посочи дека власта ја крие од јавноста постапката за одобрување заем од ЕБОР.
„Прво самиот процес на задолжување е проблематичен се земаат пари заради неодговорни политики и ќе ги враќаат генерациите понатаму. Второ и уште попроблематично е што Владата доставува закон во Собрание но во него не го доставува клучниот дел кој ќе ви го прочитам кој вели – доколку се подигне овој кредит треба да се потпише договор од кој точка 5.3.3 е деактивирање на постоечката ТЕЦ на јаглен Осломеј и термоелектраната Битола тоа е познатата РЕК Битола и стопирање на активности во овие термоелектрани. ТЕЦ Осломеј да се затвори до крај на 2023 година ТЦ Битола до крај на 2027 година односно“,
информираше Николоски.
Николоски кажа дека ова е дел од постапката за одобрување на заем, односно кредит и ја обвини власта оти е нетраспарентна во информирањето на јавноста по ова прашање. Власта, додава Николоски, во ниту еден момент не кажа дека услов за кредитот е Кичево и Ботола да станат пусти градови едниот по 2023, а другиот по 2027 година.
„Оттука по 2027 година Македонија практично нема да произведува сопствена електрична енергија и целосно да е увозно зависна и цените кои ги има стопанството да ги имаат сите граѓани, преку 7 илјади лица да останат на улица и веројатно уште стотици кои би останале на улица поради компаниите. Така што она што е значајно дека ги кријат клучните елементи за да земат заем“,
кажа Николоски.