Претседателот Петер Пелегрини рече дека Словачка ја поддржува европската перспектива на Северна Македонија и тоа го прави како пријател, партнер и сојузник. Порача дека Северна Македонија, но и регионот чиј дел е земјава, е многу важен за целата Европа, оценувајќи дека тој не смее да остане простор на геополитички натпревар и игри
Проширувањето мора да биде фер, предвидлив и процес заснован на истите правила кои важат за сите кандидати – изјави денеска словачкиот претседател Петер Пелегрини за време на заедничката прес-конференција со македонската претседателка Гордана Сиљановска-Давкова, која е во официјална посета на Братислава.
Пелегрини рече дека Словачка ја поддржува европската перспектива на Северна Македонија и тоа го прави како пријател, партнер и сојузник. Порача дека Северна Македонија, но и регионот чиј дел е земјава, е многу важен за целата Европа, оценувајќи дека тој не смее да остане простор на геополитички натпревар и игри.
„Ставот на Словачка е јасен – стабилен и просперитетен и европски ориентиран Западен Балкан, бидејќи тоа е во стратешки интерес за целата Европа. Партнери сме коишто го поддржуваме европскиот пат на Северна Македонија и истовремено знаеме дека довербата во Европа се темели на правила и добрососедски односи. Нашата амбиција не е да се решаваат чувствителните прашања од перспектива на судија, туку предлогот е да се почитува европската перспектива на регионот, притоа да се почитува и достоинството на сите вклучени страни“,
изјави Пелегрини на заедничката прес-конференција со Сиљановска-Давкова.
Словачкиот претседател останува на ставот дека земјите кандидати мора да ги исполнат договорените критериуми, но и дека ЕУ мора да испрати јасен сигнал оти исполнувањето на условите ќе значи и конкретни чекори напред.
Осврнувајќи се на Украина, тој рече дека ниедна земја, без разлика во колку тешка состојба да се наоѓа, не смее да има предност и по скратен пат да влезе во Унијата, туку треба да го изоди патот на преговори и реформи бидејќи во спротивно би било негативно во однос на земјите од Западен Балкан кои долги години се во преговорите.
„Затоа, земјите кои имаат право да станат членки на Европската Унија, првенствено се земјите од Западен Балкан, вклучително и Северна Македонија. ЕУ има свои правила кои треба да се следат. Во случај Украина да ги исполни овие услови и да го следи тој пат, Словачка секако ќе ја поддржи Украина во тој процес, но нема да поддржи никакви скратени патишта, ниту пак привилегии што ќе се понудат на одредени земји пред други“,
додаде Пелегрини.
Претседателката Гордана Сиљановска-Давкова денеска и утре е во официјална посета на Словачка.