Јавните комунални претпријатија предупредуваат дека постои опасност над еден милион граѓани да останат без вода за пиење, а 15 илјади вработени без работа
На оваа тема пратеникот Бојан Стојаноски од ВМРО-ДПМНЕ на вчерашната собраниска седница го праша премиерот Ковачевски зошто упорно одбива да ги вклучи овие претпријатија во антикризните мерките. Премиерот, пак, му одговори дека директорите на тие претпријатија треба да направат реконструкција на своите трошења, наведувајќи ги како пример за нерационално трошоци стоте партиски вработувања во скопски „Водовод“ од страна на разрешениот директор од ВМРО-ДПМНЕ, а за кои обелодени градоначалничката Арсовска
Покачување на сметките за вода и комунални услуги е најнепосакуваното решение што ни преостанува, реагираат од АДКОМ – Здружението на даватели на комунални услуги во кое членуваат повеќе од 90 јавни комунални претпријатија во земјава.
Нивната реакција доаѓа, според соопштението, од причина што не влегле во владиниот пакет за субвенции на трошоците за струја.
„Јавните комунални претпријатија (ЈКП) очекуваа Владата да ги исполни своите најави дека, во интерес на граѓаните и тие ќе влезат во овој пакет мерки. АДКОМ веќе излезе со последно предупредување и барање, Владата да им помогне да ја надминат енергетската криза. Сега останува најнепосакуваното решение – повисоки сметки за вода и комунални услуги со што ќе се удри по џебот на граѓаните. Од ЈКП уште еднаш предупредуваат дека постои опасност над милион граѓани да останат без вода за пиење, а 15 илјади вработени без работа“,
велат од АДКОМ.
Тие бараат Владата да има слух и порачуваат дека се подготвени за соработка.
Барањата од АДКОМ вчера се наметка како една од темите и на собраниската седница за пратеничка прашања. Пратеникот Бојан Стојановски од ВМРО-ДПМНЕ го праша премиерот Димитар Ковачевски зошто ги одбива барањата од ова Здружение.
„Второто прашање е за повикот за закон за енергетика каде ја повикавте опозицијата да гласа, со тоа што во регулираниот пазар ќе влезат здравствените установи и училиштата. Тоа и ние го баравме од вас, но вие да одговорите зошто не одговарате на барањата на АДКОМ за да им помогнете со антикризните мерки. Во тие претпријатија работат над 10 000 граѓани, а вие знаете дека ќе треба да се качат цените заради цената на струјата. Дали планирате да ги вклучите јавните претпријатија во мерките за да го заштитите буџетот на граѓаните?“,
праша Стојаноски.
Премиерот, пак, му одговори дека директорите на тие претпријатија треба да направат реконструкција на своите трошења, наведувајќи ги како пример за нерационално трошоци обвинувањата од скопската градоначалничка Арсовска дека разрешениот директор на „Водовод и канализација“, Златко Перински од ВМРО-ДПМНЕ, имал 100 партиски вработувања.
„Има неколку типови на јавни претпријатија, дел се комунални претпријатија во општините, дел се тие за снабдување со вода, дел се државни. Еве ќе ви кажам еден пример: излегува градоначалничката на град Скопје и вели во ’Водовод‘, таму каде што таа поставила директор од вашата партија има 100 партиски вработувања коишто ништо не придонесуваат во работата на компанијата. 100 партиски вработени, тоа е плата, придонеси, канцеларии, електрична енергија, загревање, мобилни, хартија, одржување … тоа се 1 000 евра по човек, тоа се вкупно 100 000 евра. Па, сметката за струја сигурно не им дојдена 100 000 евра. Обврска на тие претпријатија е да направат реорганизација и да направата реструктурирање на своите трошења ако сакаме да работиме економски така како што владата ги намалуваше во неколку наврати над 200 милиони трошењата“,
одговори Ковачевски.