Рамчиловиќ е единствен од пратениците што беа исклучени од ВМРО-ДПМНЕ поради гласањето за уставните измени, кој сега гласал „за“ и за двата закони за обвинителството, додека Канческа е единствена што се воздржа од гласање и во двата случаи
Седумтемина независни пратеници што останаа во пратеничката група што се издвои од ВМРО-ДПМНЕ не гласале за Законот за Совет на јавни обвинители, кој беше донесен со 73 гласа „за“ во неделата. Така е направена разликата од седум гласа помалку во однос на двотретинскиот Закон за јавно обвинителство, кој беше донесен претходно со точно 80 гласа.
Од какво било гласање за Законот за Совет на јавни обвинители се воздржал и пратеникот Панчо Минов, кој претходно гласаше „за“ Законот за ЈО. Поранешната министерка за култура Елизабета Канческа-Милевска, која е опфатена со еден од процесите на СЈО, е единствена од независната пратеничка група, која се воздржа од изјаснување и за двата закона.
На собраниската веб-страница, денеска е објавен листингот од гласањето за Законот за Совет на јавни обвинители, чие донесување во неделата предизвика несогласувања меѓу спикерот Талат Џафери и ВМРО-ДПМНЕ околу тоа дали требало или не да има и гласање според Бадинтеровиот принцип. Листингот покажува дека Зекир Рамчиловиќ е единствен од пратениците кои беа исклучени од ВМРО-ДПМНЕ, поради гласањето за уставните измени, кој сега гласал „за“ и за двата закони за обвинителството. Тој пред неколку месеци ја напушти независната пратеничка група, по што беше избран за потпретседател на парламентот.
Емилија Александрова, Владанка Авировиќ (од СПМ), Нола Исмајлоска-Старова, Крсто Мукоски, Сашо Василевски и Љубен Арнаудов се шестемина независни пратеници, кои овој пат го помогнаа донесувањето на Законот за ЈО, ама не гласаа воопшто за Законот за Совет на обвинители, иако двете регулативи се поврзани.
Александрова, во изјава за „360 степени“ вели дека биле фокусирани на Законот за СЈО и не стигнале да побараат правни консултации за Законот за Советот на обвинители. Затоа и решиле да не гласаат.
„Бевме концентрирани на Законот за ЈО и на подобрување и усогласување на неговата содржина. затоа не стигнавме да се консултираме околу текстот на Законот за Совет на обвинители. Тоа беше причината поради која одлучивме да не гласаме ниту ’за’, ниту ’против’, ниту ’воздржано’. Нема потреба ние да бидеме посочувани како одговорни за промената на името на државата. Преспанскиот договор беше една отворена врата за остварување на евроатлантските перспективи на државата. И ние со нашето гласање и тогаш за уставните измени и сега за Законот за ЈО, само дадовме поддршка за тие перспективи“,
вели Александрова.
На прашање дали „отпишаните“ од ВМРО-ДПМНЕ планираат да се ангажираат во претстојната предизборна кампања и евентуално да најдат модус за учество на изборите, Александрова вели дека тоа е тешко изводливо во овој момент, посебно ако се има предвид дека останува стариот изборен модел со шест изборни единици. Да се воведеше една изборна единица, како што вели, ќе се отворел поголем простор за самостоен настап на изборите за помали политички субјекти.
„Да видиме како ќе завршат изборите, за кои се надеваме дека ќе бидат фер и демократски и според европските стандарди. Потоа, во зависност од резултатот, би ги одредиле насоките на нашиот иден политички ангажман. Лично, сметам дека по изборите, во зависност од резултатите, би требало да се насочиме кон демократизација и демократски промени во нашата матична партија – ВМРО-ДПМНЕ“,
вели Александрова.