Од Музејот на Македонската борба – Скопје, тврдат дека биле измамени од невладина организација што потпишала договор за да организиран настан на терасата на Порта Македонија, а наместо одржување на настанот, бил поставен транспарент со недолична содржина.
Зад транспарентот стоеше партијата ВМРО-ДПМНЕ, која ѝ одржа прес-конференција.
„Согласно потпишаниот договор, на терасата, почитувајќи ги сите препораки за заштита од ковид-19, денеска требаше да се одржи настан ’Состанок со млади лица за подигање на јавната свест кај младите за заштита на културното и историско богатство на нашата земја‘, во траење од 1 час. Наместо состанокот, присутните, го искористиле моментот и неовластено го истакнале транспарентот со цел истиот да биде снимен и пренесен од медиумите“,
соопштија од Музејот.
Оттаму потсетуваат дека не бил испочитуван договорот во кој се предвидува дека изнајмениот простор ќе се користи исклучиво за тоа за што е договорено односно дека нема да се злоупотреби за националистички и дискриминаторски цели и дискриминациски претензии на национална, верска или кој било вид на разгорување човечка нетрпеливост.
„Ја информираме јавноста дека музејот ќе ги преземе сите правни чекори за утврдување одговорност на учесниците и потписникот на договорот. Самиот настан претставува груба манипулација со граѓаните во име на невладините организации, а музејот ќе преземе мерки за откривање на сторителите и сите вклучени овој немил настан“,
велат од Музејот.
На транспаренотот за кој реагираат од Музејот пишуваше: „Еве го бројчаникот на Заев. 1 136 починати. 39 760 заразени. 2 000 000 000 долг. 40 000 избркани од работа. Вето за ЕУ. Можеме уште повеќе“.
Додека истиот беше обесен на Порта Македонија, портпаролот на ВМРО-ДПМНЕ Наум Стоилковски одржа прес-конференција пред овој објект.
„Бројчаникот кој го вети Заев, изгледа вака. Ова се бројки кои што ја покажуваат реалната слика со која што сите ние се соочуваме. Имаме вкупно 39.760 активни случаи на ковид и 1 136 починати лица. Имаме 2 милијарди евра долг односно над 60% од БДП. Имаме нови 40.000 невработени лица од март до октомври и имаме вето за евроинтеграција на Македонија. Тоа е учинокот на Зоран Заев, затоа треба оставка и тоа веднаш“,
рече Стоилковски.