Неоправдано е зголемувањето на цените на осигурувањето од задолжителна автомобилска одговорност, тврди Агенцијата за супервизија на осигурувањето

„Врз основа на анализа на историски статистички и финасиски податоци и примените проекции за развој на коефициентот штети на друштва за осигурување, Агенцијата смета дека одлуките на друштвата за осигурување за идентично зголемување на премите за задолжително осигурување од АО не се оправдани“, се вели во анализата на Агенцијата

Целосно е неоправдан потегот со кој осигурителните компании ги зголемија цените на осигурувањето од задолжителна автомобилска одговорност, информира Агенцијата за супервизија на осигурувањето, која е регулатор на пазарот на осигурување.

Оттаму велат дека зголемувањето на цената на осигурувањето не е во функција на јакнење на заштитата на осигурениците.

До надлежната комисија при Министерството за финасии, Агенцијата доставила анализа во која се содржани клучните аргументи против зголемување на цената на осугурувањето од задолжителна автомобилска одговорност.

„Врз основа на анализа на историски статистички и финасиски податоци и примените проекции за развој на коефициентот штети на друштва за осигурување, Агенцијата смета дека одлуките на друштвата за осигурување за идентично зголемување на премите за задолжително осигурување од АО не се оправдани“,

пишува во анализата на Агенцијата за супервизија на осигурување.

Осигурителните компании да ги стават во мирување одлуките за зголемување на трошоците, бара Комисијата за осигурување од автомобилска одговорност

Напротив, како што се вели во анализата, ова зголемување на цените е само и исклучиво во функција на покривање на трошоците за оперативно работење на компаниите за осигурување.

Агенцијата ја охрабрува Владата, согласно своите законски надлежности да ги заштити правата на осигурениците и преку измени во Тарифникот да ги намали цените на полисите за задолжително осигурување од автомобилска одговорност.

Со донесените одлуки за зголемување на цената на полисата за задолжителното автоосигурување од страна на осигурителните компании за 15,44 отсто поскапува полисата што ја плаќаат граѓаните при регистрација на нивните возила со моќност од над 44 киловати. Поскапувањето е од 840 до скоро 1 600 денари во зависност од моќноста на возилото.