На средбата со хрватскиот претседател, претседателка посочила на потребата Европската Унија да ја потврди својата јасна посветеност на регионот, како што тоа било направено на Самитот во Солун во 2003 година, а процесот на интеграција да се базира на исполнување на Копенхашките критериуми, како единствен услов за влез во Унијата
Евроинтеграцискиот процес мора да се ослободи од оковите на билатералните прашања и целосно да се дебилатерализира истакнала претседателката на државата Гордана Сиљановска-Давкова на средбата со хрватскиот колега Зоран Милановиќ. Таа, во овој контекст, посочила на опасноста од зголемување на евроскептицизмот поради актуелниот ќор-сокак во кој се наоѓа процесот.
Сиљановска-Давкова и Милановиќ за овие прашања разговарале на средба во Тиват, Црна Гора, каде што претседателката заедно со своите колеги од регионот учествува на состанокот на лидерите на земјите учеснички во Процесот Брдо-Бриони.
Покрај со хрватскиот, Сиљановска-Давкова денеска се сретнала и со словенечката претседателка, Наташа Пирц Мусар, како и со Жељка Цвијановиќ, членка на Претседателството на Босна и Херцеговина (БиХ).
На средбата со Милановиќ, како што соопштија од нејзиниот кабинет, македонската претседателка посочила на потребата Европската Унија да ја потврди својата јасна посветеност на регионот, како што тоа било направено на Самитот во Солун во 2003 година, а процесот на интеграција да се базира на исполнување на Копенхашките критериуми, како единствен услов за влез во Унијата.
Во контекст на регионалната соработка, претседателката Сиљановска-Давкова истакнала дека нејзиното зајакнување ќе обезбеди нашиот регион да остане отпорен на надворешни притисоци.
„На средбата претседателката Сиљановска-Давкова потенцираше и дека како НАТО сојузници, силно сме посветени на промовирање и споделување на заедничките вредности и одговорности во рамките на Алијансата, придонесувајќи за меѓународните мировни операции, споделувајќи заеднички ставови во однос на ситуацијата на регионално и мултилатерално ниво за мир и стабилност во регионот“,
се наведува во соопштението од кабинетот на Сиљановска-Давкова за средбата со хрватскиот претседател, Милановиќ.
Евроинтеграциите биле фокусот и на средбата на Сиљановска-Давкова со нејзината словенечка колешка, на која македонската претседателка упатила благодарност за силната и отворена поддршка на Љубљана за македонската европска интеграција, истакнувајќи, како и на состанокот со Милановиќ, дека процесот не смее да биде заложник на билатерални прашања.
„Истакнувајќи дека Европската Унија врши притисок врз земјите-членки кога тоа е потребно во многу други случаи, претседателката Сиљановска-Давкова порача дека во нашата ситуација неопходни се лидери и земји кои ја разбираат нашата позиција, кои ќе помогнат да се осигураме дека нашиот глас јасно ќе се слушне во наредниот период. Претседателката нагласи дека е време да се потенцираат критериумите од Копенхаген во процесот на интеграција во Европската унија и да се потврди јасната посветеност на регионот“,
се вели во соопштението од кабинетот на претседателката.
На средбите со двајцата претседатели била изразено задоволството од одличните пријателски односи и соработката на земјава со Хрватска и Словенија и биле нагласените заложбите за нивно проширување и зајакнување.
„Во контекст на соработката на меѓународен план, претседателките Сиљановска-Давкова и Пирц Мусар констатираа дека двете земји се усогласени со целите за зајакнување на мултилатерализмот и промовирање на мирот и одржливиот развој, а беше истакната и долгогодишната соработка во рамките на Обединетите нации“,
се наведува во соопштението за средбата.
На средбата со членката на Претседателството на Босна и Херцеговина, Сиљановска-Давкова ја изразила македонската поддршка за европските и евроатлантските аспирации на БиХ, како и подготвеноста на земјава за размена на искуства.
„На средбата стана збор и за минатонеделните поплави во Босна и Херцеговина, при што претседателката Сиљановска-Давкова изрази длабоко сочувство до семејствата на настраданите и брзо закрепнување на повредените“,
се вели во соопштението.