Немаме договор за промена на државниот грб, но разговараме за сите отворени прашања, вели Меџити

Во интервју за ТВ 24, првиот вицепремиер и министер за животна средина вели дека никој не може да го оспори фактот што и државниот грб и националната химна потекнуваат од, како што рече, комунистичко време и не ја одразуваат реалноста онака како што треба

Немаме договор, но разговараме за сите отворени прашања, вели првиот вицепремиер и министер за животна средина Изет Меџити прашан дали постои договор со ВМРО-ДПМНЕ за промена на државниот грб.

Во интервју за ТВ 24, тој вели дека никој не може да го оспори фактот што и државниот грб и националната химна потекнуваат од, како што рече, комунистичко време и не ја одразуваат реалноста онака како што треба.

Отворено, како што рече, е и прашањето за албанскиот јазик.

„Сите знаеме дека формулацијата ‘јазикот што го говорат 20 проценти од граѓаните’ е омаловажувачка и потценувачка за втората заедница во државата, но ова се разговори, немаме договор“,

изјави Меџити во емисијата „24 анализа“

• Касами освен државниот грб смета дека треба да се сменат и химната и формулацијата „20 отсто“

Премиерот Христијан Мицкоски вчера информира дека во владејачката коалиција го отвориле прашањето за промена на државниот грб, велејќи дека земјава е една од двете постсоцијалистички држави што сè уште го имаат стариот државен грб, со некои мали модификации.

• ВМРО-ДПМНЕ и „Вреди“ го отвориле прашањето за промена на државниот грб

Коментирајќи на темата, лидерот на опозицискиот СДСМ, Венко Филипче, пак, рече дека доколку има иницијатива за промена на државниот грб, тие најостро ќе се спротивстават.

• Дали можеби се разговара и за промена на химната, праша Филипче откако од власта потврдија дека го отвориле прашањето за државниот грб