„Мислам дека повеќе е перцепција во јавност, која е потпомогната од инсталации на ДУИ во медиумскиот простор, но пред нас имаме доволно време за да го покажеме спротивното“, вели министерот за европски прашања и потпретседател на Алтернатива
Односите во Владата се коректни и гледам многу голем мотив и потенцијал да продолжиме со процесите и понатаму, но морам да забележам дека средбата на лидерот на ЗНАМ, Максим Димитриевски, со рускиот амбасадор во Општина Куманово испраќа многу погрешна порака до нашите стратешки партнери – вели министерот за европски прашања Орхан Муртезани во гостување во емисијата „360 степени“ на МРТ 1.
Првите сто дена од Владата Муртезани ги спореди со почеток на нова фудбалска сезона во која, како што вели, потребен е одреден период за да се види кој на која позиција би играл најдобро, односно како своевиден тест за тоа кој може да донесе резултати и какви.
„Последните дваесетина дена сметам дека се паднати притисоците, атмосферата во рамките на Владата е многу конструктивна и гледам многу голем мотив и потенцијал за заеднички да се тераат некои процеси натака. Ние заеднички ја формираме Владата и ќе мора заеднички да испорачаме резултати“,
рече Муртезани.
На прашањето – дали во коалицијата „Вреди“, од каде што доаѓа Муртезани, имаат чувство дека поголемиот коалициски партнер ВМРО-ДПМНЕ сака да им покаже „каде им е местото“, со оглед на реакциите по изјавата на Изет Меџити дека во владината коалиција имаат договор законот за бранители да остане блокиран и изјавата на Халил Снопче дека „Вреди“ ќе излезе од Владата ако се донесе законот за бранители, Муртезани ја оцени изјавата на Снопче како избрзана.
„Мислам дека таков став сподели и претседателот на Алијанса за Албанците, Арбен Таравари. Ние сме дел од Владата и треба да дејствуваме преку владините механизми. Не делам таков впечаток дека ВМРО-ДПМНЕ се обидува да ни покаже каде ни е местото бидејќи тоа не се чувствува во системот и механизмот на владеење. Мислам дека повеќе е перцепција во јавност која е потпомогната од инсталации на ДУИ во медиумскиот простор, но пред нас имаме доволно време за да го покажеме спротивното“,
кажа Муртезани.
Прашан за односите со другиот коалициски партнер – ЗНАМ, со кој имаа несогласувања во првите денови од функционирањето на владината коалиција, Муртезани вели дека внатре во рамките на Владата ваквите искри не се чувствувале, но додаде дека состанокот на лидерот на ЗНАМ, Максим Димитриевски, со рускиот амбасадор во Општина Куманово дава погрешна порака до стратешките партнери на земјава и е во спротивност со ориентацијата на Владата.
„Меѓутоа, морам да нагласам дека тоа е ориентација на ниво на општина кое никако не смее и не може да се одрази на Владата бидејќи тој феномен сме го виделе и порано, кога во 2020 година тогашниот градоначалник на Општина Центар се среќаваше со рускиот амбасадор и договараа изградба на меморијален центар зад Универзалната сала и никој не сметаше дека тогаш е нарушена ориентацијата на Владата, но се согласувам дека тоа е погрешно“,
заклучи министерот за европски прашања.