Вака реагираат директорите на скопските средни училишта кои ги исконтактира „360 степени“ откако меѓу средношколците почнаа да кружат информации дека ќе немаат настава бидејќи нема автобуси
Училиштата ќе имаат редовна настава без оглед на ситуацијата со редуцираниот автобуски превоз, а учениците треба да дојдат на часови. Вака реагираат директорите на скопските средни училишта што ги исконтактира „360 степени“ откако меѓу средношколците почнаа да кружат информации дека ќе немаат настава бидејќи нема автобуси.
Директорите се согласни дека не добиле никакви насоки од Министерството за образование и наука (МОН). Според нив, за евентуални промени во наставата, одлука може да донесе само Владата.
Дарко Спасев, директор на средното хемиско училиште „Марија Кири Склодовска“ во скопската општина Аеродром, вели дека и покрај тоа што поради недостиг на автобуси одредени ученици утрово доцнеле на часовите, сепак, наставата се одвива според планот и програмата.
„Меѓу учениците можат да се шират секакви информации, но не смее да има прекин во воспитно-образовниот процес. Додека владата не донесе одлука за такво нешто, наставата се одвива непрекинато“,
рече директорот.
Јасминка Гудоманова, директорка на средното стручно „Димитар Влахов”, вели дека иако утрово одредени ученици што живеат во приградските населби имале проблем да пристигнат навреме на наставата, сепак часовите се одржуваат во редовен тек.
„Немаме најава или одлука од надлежна институција да се кратат часовите“,
вели Гудоманова.
Директорите на гимназиите „Никола Карев“ и „Георги Димитров“, Андреј Манолев и Саша Стојменов, исто така ни потврдија дека во училиштата има редовна настава и дека не добиле никакви насоки од МОН.
„Ќе има настава, сè е во ред“,
ни изјави Стојменов.
„Да, ќе имаме редовно настава, учениците можат да зборуваат што сакаат“,
рече Манолев.
Сепак, неколку наставници во разговор за „360 степени“ посочија дека ученици доцнат на часовите, а родители од утрово им најавиле дека нивните деца денеска нема да присуствуваат на настава, оти немаат како да пристигнат до училиштето.
Скопјани од утрово мора да се снаоѓаат за да стасаат до своите работни места поради вчерашните најави на синдикатите при ЈСП „Скопје“ дека јавниот градски превоз во главниот град ќе се одвива со драстично редуциран број на автобуси, поради недостиг на гориво.
Уште од вчеравечер граѓаните на социјалните мрежи се организираат како да стигнат на работа. Така, во многу групи на социјалните мрежи се нудат слободни места во автомобилите и се посочува релацијата на која ќе се движат.
Од синдикатите на Јавното сообраќајно претпријатие „Скопје“, во изјави за медиумите вчера информираа дека во Скопје сообраќаат само 25 автобуси, а останатите се паркирани во автобазите на Јавното сообраќајно претпријатие „Скопје“ во Автокоманда и во Ѓорче Петров поради недостиг на гориво.
Јавниот градски превоз во Скопје колабира – нема гориво за автобусите
Денеска во 18 часот Советот на Град Скопје ќе одржи итна вонредна седница поради состојбата со јавниот градски превоз. Седницата ја свика претседателот на Советот, Трајко Славески.