Оттаму во соопштението додаваат дека Министерството и понатаму внимателно ја следи состојбата на повредените пациенти и останува во постојана комуникација со медицинските тимови во земјава и во странство
На лекување во странство во моментов се наоѓаат 69 пациенти од повредените во трагедијата во т.н. кабаре „Пулс“ во Кочани, информираа денеска од Министерството за здравство (МЗ), додавајќи дека нема промена на нивната состојба во споредба со претходните денови.
Непроменета, велат од Министерството, е и состојбата на критичните пациенти, кои, според информациите објавени вчера, се тројца.
Во здравствените установи во Скопје и понатаму на лекување се наоѓаат 15 од повредените во пожарот во Кочани.
„Од нив, шестмина во хируршката клиника ‘Св. Наум Охридски’. На Клиниката за пластична хирургија се четворица пациенти, пристигнати синоќа од странство. На Клиниката за токсикологија има двајца пациенти – еден, претходно префрлен од хируршката клиника ‘Св, Наум Охридски’, и еден кој ноќеска е дојден од Шпанија. Еден пациент е хоспитализиран на Клиниката за пулмологија. Во (приватната клиника) ‘Систина’ се лекуваат двајца пациенти. Сите пациенти кои се третираат во нашите установи се во стабилна состојба“,
велат од Министерството за здравство.
Оттаму во соопштението додаваат дека Министерството и понатаму внимателно ја следи состојбата на повредените пациенти и останува во постојана комуникација со медицинските тимови во земјава и во странство, заради обезбедување најдобра можна нега за повредените од несреќата во Кочани.
Во пожарот што на 16 март се случи во т.н. кабаре „Пулс“ во Кочани животите ги загубија 60 лица, а повредени се речиси 200 луѓе.
Вчера од Министерството за здравство соопштија дека 29-годишниот Александар Карадаковски, управител на т.н. кабаре „Пулс“, кој беше на лекување во Литванија, е 60-та жртва на катастрофалниот пожар.
Тој, како што кажа министерот за здравство Арбен Таравари на прес-конференција, бил еден од ден од четворицата многу критични пациенти кои се згрижени надвор од државата. За жал, рече министерот, Карадаковски им подлегнал на повредите, а другите тројца и натаму биле во многу критична состојба.
Телото на Карадаковски ќе биде транспортирано во Македонија, а обдукцијата ќе биде извршена во Судска медицина во Скопје, соопшти министерот на здравство.
Инаку, тој беше еден од 27-те осомничени физички лица во истрагата за пожарот што ја отвори Основното јавно обвинителство во Кочани, но постапката за него ќе биде запрена, информираа вчера од Јавното обвинителство.