Следната недела продолжува реконструкцијата на старата и дотраена дрвена платформа, особено во делот кој се користи за паркирање на воени и цивилни пловни објекти, порача министерката за одбрана Славјанка Петровска по посетата на Центарот за обука на вода во Охрид. Според министерката, добиени се позитивни мислења од надлежните институции – целта е да се зголеми безбедноста при користењето на пловниот канал, а притоа на никој начин да не се наштети на животната средина.
При реконструкцијата ќе се користат еколошки материјали, потенцира Петровска.
„Се обративме до Министерството за животна средина, до Управата за заштита на културните споменици и УНЕСКО, кои по увидот во документација и елаборатот за заштита на животна средина, констатираа дека нема опасност по животната средина и добивме дозвола да продолжиме со реконтрукцијата“,
вели Петровска.
По увид во состојбата од пред повеќе од година дена констатирано било дека сидриштето е во мошне лоша состојба и претставува опасност за сите што го користат.
Поради тоа Министерството на одбрана спроведе јавна набавка за реконструкција на сидриштето, избран е најдобриот понудувач, но поради забелешки од страна на невладина организација дека реконструкцијата неповолно ќе влијае врз животната средина и еко-системот на Студенчишкото блато каде се наоѓа и самиот Центар за обука на вода на АРМ, реконструкцијата беше стопирана.
Сидриштето што се користи за пловила на Министерството и на други субјекти, се очекува да биде готово за 45 дена, согласно договорот склучен со изведувачот, порача министерката.