Секој граѓанин што планира да излезе или да влезе во државата треба да приложи: сертификат за вакцинација со две дози, потврда дека го прележал вирусот 45 дена од денот на оздравување, негативен ПЦР-тест не постар од 72 часа или брз антигенски тест не постар од 48 часа
На граничните премини за излез и влез во земјава нема да има можност за тестирање на ковид-19, велат од Владата како појаснување за новите мерки кои од денеска се во сила со приложување на негативен ПЦР-тест или негативен брз антигенски тест за излез од државата.
Мерката за приложување сертификат за вакцинација или потврда за прележан ковид-19, Владата ја усвои со единствена цел земјата да не се препознае како извозник на вирусот. На денешната прес-конференција на портпаролите на Владата беше истакнато дека оваа мерка е придонес за поддршката на масовната имунизација како најсоодветен одговор за спречување на ширење на вирусот ковид-19.
„Мерката е израз и наша определба да направиме сè што е потребно нашата земја да се препознае како земја која води активни политики за имунизација и која не треба да се препознава како земја извозник на вирусот. Треба да се има предвид дека постапка за обезбедување доказ за вакцинација или за прележан ковид-19 е вообичаена постапка за проверка на граничните премини при влез во огромен европски и светски земји, која граѓаните секако треба да ја испочитуваат и затоа ова мерка во голем процент и се спроведува“,
изјави портпаролот на Владата Мухамет Хоџа.
Оттаму одговорија и на прашањето зошто потврдата за прележан вирус не трае повеќе од 45 дена, барем шест месеци како што е пракса во сите други држави.
„Сите мерки што ги носи Владата се по препорака на Комисијата за заразни болести. Овие документи треба да се приложат при излез од нашата држава. Секој граѓанин што планира да излезе од државата и да патува и во големиот дел од европските држави и од светот треба да ги приложи истите документи, сертификат за вакцинација со две дози, ПЦР-негативен од 72 часа или брз антигенски тест од 48 часа“,
изјави Хоџа и додаде дека нема да има можност за тестирање на самите гранични премини.