Владата нема политичка моќ да го пролонгира времето за трошење на платежните картички, кои беа дадени за надминување на корона-кризата, а чиј рок истекува на 15 август.
Одговарајќи на новинарско прашање, вицепремиерката Мила Царовска објасни дека во моментов Владата нема моќ да ги продолжи роковите зашто тие се дефинирани во уредби со законска сила.
„Приговорите за домашните платежни картички нема да пропаднат, граѓаните ќе ги остварат своите права, но периодот на трошење на средствата ќе биде пократок ако не се изнајде друго решение. Уредбите беа донесени во вонредна состојба. Сега сме во поинаква ситуација. Ако се воспостави Собранието побрзо и ако се оди кон одредена законска измена, но сметам дека тоа е прекомплицирано за сега да може да се направи. Може да се отвори како дискусија на Влада, ако има одреден став ќе може да го презентираме, но роковите се поставени во уредби со законска сила, кои немаме моќ во овој момент да ги менуваме. Нашите овластувања и моќ во овој момент не се такви“,
истакна Царовска.
Заклучно со 25 јули се издадени над 300 000 домашни платежни картички. Сите приговори се обработени и од вкупно поднесените 46 000 прифатени се 9 200.
Но, бидејќи рокот истекува за две недели, неизвесно е дали граѓаните чии приговори се прифатени ќе имаат време да ги завршат бирократските процедури и да ги користат картичките.
Вицепремиерката нагласи дека се очекува поскоро формирање на владата и парламентарниот состав, за да може да се донесе и четвртиот пакет мерки за економска поддршка.
„Во овој момент Владата нема моќ да носи уредби или пакети на поддршка, но очекуваме да се формира брзо нова влада, да се воспостави собраниското мнозинство и на тој начин да се воспостави и четвртиот пакет за поддршка и на граѓаните што беше најавен, но и на компаниите кои имаат потреба или најзагрозените сектори. Во моментов тече Програмата за поддршка на инвестиции, голем дел од компаниите аплицираат и во Министерството за економија во делот на конкурентноста. Добро е да се искористат и овие средства за развој на компаниите кои решиле во овој период да инвестираат“,
рече Царовска.
