На јужната граница во моментов нема мигранти, а нив ги нема ниту во прифатниот транзитен центар „Винојуг“, информираа денеска од Регионалниот центар за управување со кризи.
Околу 180 мигранти, кои во деновите од викендов биле фатени во обид за нелегално влегување во земјава, веќе се вратени назад во Грција и моментно гевгелискиот камп е празен.
Градоначалникот на Гевгелија, Сашо Поцков, рече дека општината редовно информира за реалната состојба на јужната граница заради сузбивање на лажните вести и намалување на психолошкиот притисок.
„Како општина сме вклучени во подготовките и координацијата со институциите во системот за управување со кризи, пред сè за справување со можен зголемен бран бегалци и мигранти. Во редовна координација сме и со главниот штаб за справување со кризи кој редовно ја следи состојбата и дава насоки за постапување“,
рече Поцков.
Поради коронавирусот, кој претставува дополнителен проблем, во ПТЦ „Винојуг“ е поставен контејнер за изолација на лица од ризичните земји, а поставување на таков контејнер во кругот побара и Општата болница од Гевгелија.