Според опозициската партија, Заев е последниот остаток од транзицијата кој мора да биде поразен
ВМРО-ДПМНЕ се јави со брза реакција на денешното интервју на лидерот на СДСМ Зоран Заев за „А1он“, во кое тој најавува дека во август ќе биде формирана новата влада, додека за Христијан Мицкоски оценува дека е „аутсајдер“.
Од ВМРО-ДПМНЕ велат дека победиле во 41 општина и освоил повеќе пратеници отколку СДСМ без коалицискиот партнер Беса, и покрај, како што се наведува, недемократската атмосфера и масовниот поткуп „што екипата на Заев го правеше во текот на кампањата“.
„Влада на Заев ќе значи дополнително тонење на економијата и распламтување на здравствената криза, нешта со кои тој и СДСМ покажаа дека ниту знаат ниту можат да се справат. ВМРО-ДПМНЕ е партијата која доби поддршка кај народот и која ќе се справува со сите предизвици пред кои се исправени Македонија и народот. Блескањето на Заев ја урниса Македонија, па сме доведени во ситуација државата да нема пари по септември. На тоа мора да се стави крај. Заев е последниот остаток од транзицијата кој мора да биде поразен, затоа што со таков политичар Македонија нема европска иднина, затоа што истиот е антипод на европските вредности. Покажа во овие три години дека ниту економски успеси немаше, немаше ниту правда, немаше ниту борба против криминалот, туку напротив беше носител на сите порази, неуспеси на Македонија и на крајот на краиштата беше синоним за корупцијата“
се наведува во реакцијата на ВМРО-ДПМНЕ на интервјуто на Заев.