„Холокаустот не започна со гасни комори, туку со зборови на омраза, со дискриминација, со постепено одземање на правата. Тој започна со малите зла, кои кога не беа спречени се претворија во најголемата трагедија на 20 век. Должност наша е да помниме и да учиме“, рече премиерот на одбележувањето на 82 години од депортацијата на македонските Евреи
Ова не е само ден на тага и на сеќавање на македонските Евреи, туку и ден на предупредување, ден во кој ние како народ и човештвото потврдуваме дека никогаш нема да дозволиме историјата да се повтори. Ова денеска во својот говор го рече премиерот Христијан Мицкоски, кој присуствуваше на комеморацијата на оддавање почит пред Споменикот на 7 144 депортирани македонски Евреи во скопскиот „Монопол“.
„Пред Втората светска војна во Македонија живееше динамична, просперитетна и борбена еврејска заедница. Евреите беа не само граѓани, туку и значаен дел од културниот, економскиот и социјалниот живот во градовите како Скопје, Битола и Штип. Нивното присуство беше дел од нашата историја со векови. Таа година во март, тогашната фашистичка бугарска окупациска власт во координација со нацитичките власти наредија апсење и депортација на сите Евреи од тогашната Вардарска Македонија. 7 144 мажи, жени и деца беа присилно собрани одведени во привремениот логор во Скопје во објектот на тогашниот ‘Монопол‘. Цела една заедница, цели семејства, цели генерации беа загубени“,
рече премиерот.
Денес мораме да се запрашаме, посочи тој, како можеше светот да молчи, како можеше цивилизацијата да дозволи таква неправда.
„Кога злото се шири, кога неправдата се врши, кога насилството станува праволо, ако луѓето молчат, тогаш злото победува“,
вели тој.
Затоа, вели премиерот дека наша обврска е да зборуваме и да не дозволиме нови генерации да пораснат без да ја знаат вистината, а омразата да најде ново тло за да никне.
„Холокаустот не започна со гасни комори, туку со зборови на омраза, со дискриминација, со постепено одземање на правата. Тој започна со малите зла, кои кога не беа спречени се претворија во најголемата трагедија на 20 век. Должност наша е да помниме и да учиме“,
кажа Мицкоски.
Македонија, според него, е земја на различности, земја која отсекогаш била дом на многу култури, религии и народи. Тоа, рече, е нашата сила и богатство.
„Еврејската заедница, иако речиси уништена за време на Холокаустот останува дел од нашата историја, нашето секојдневие, нашата иднина, нашето културно богатство, нашата совест. Затоа, денес, додека стоиме овде, нека нашето сеќавање не биде само минато, туку и повик за иднината. Нека нивната трагедија ни биде лекција, нека нивните животи ни бидат потсетник, нека нивната болка ни биле опомена“,
вели премиерот.