Не сум за казнување на докторите, но направен е превид и одредени мерки треба да се преземат, вели Таравари за починатото 14-месечно бебе

„Нашата цел е да воочиме дека превид може да направи секој доктор. И тука е направен професионален превид“, рече денеска министерот за здравство

Министерот за здравство Арбен Таравари вели дека до Лекарската комора се пуштени препораки за одредени мерки што треба да се преземат во врска со случајот со 14-месечното бебе, кое на почетокот на месецот почина на Детската клиника во Скопје. Уште еднаш повтори дека во овој случај е направен професионален превид.

„Нашата цел е да воочиме дека превид може да направи секој доктор. И тука е направен професионален превид. Затоа потребно е да се преземат одредени мерки. Не сум за казнување или за отстранување на докторите од работа, но одредени мерки треба да се преземат“,

рече тој денеска при посетата на пунктот за вакцинација на здравствените работници.

Двајца доктори од Детска клиника времено се отстранети од работа поради смртта на 14-месечното бебе, поведена е дисциплинска постапка

Пред една недела директорот на Универзитетската клиника за детски болести во Скопје, Реџеп Мемеди, во врска со случајот со смртта на 14-месечното бебе, донесе решение за времено отстранување на двајца здравствени работници – доктори специјалисти од здравствената установа, за кои се води дисциплинска постапка, согласно член 192 став 2 од Законот за здравствена заштита, до донесување на конечно решение во дисциплинската постапка.

За ова, Таравари рече оти се надева дека ќе се разбуди совеста и кај менаџментот на болницата во Козле и ќе бидат преземени чекори за случајот со починатото 14-месечно бебе.

Направен е превид при проценката за хоспитализација и за тежината на респираторните тешкотии, вели Таравари за смртта на 14-месечното бебе

По смртта на 14-месечното бебе, комисија направи стручен надзор во Клиниката за детски болести и Клиниката за белодробни заболувања кај децата „Козле“, при што беа констатирани системски, технички и стручни недостатоци во овој случај.

Од аспект на стручните забелешки, според Таравари, констатиран е превид во проценката за потреба од хоспитализација при вториот преглед на бебето на Клиниката за детски болести извршен на 3 октомври годинава. Во „Козле“, пак, е констатирана неадекватна и ненавремена проценка за тежината на респираторните тешкотии и третманот.