Пред една година, не криејќи го своето задоволство и благодарност за помошта која нејзината татковина ја добива од Македонија, на својот твитер налог украинската писателка напиша дека после победата над рускиот агресор, доколку преживее, Македонија ќе биде нејзината прва дестинација на која ќе го помине својот годишен одмор. Таа е 13-та жртва на рускиот ракетен напад врз пицерија во Краматорск
Наградуваната украинска писателка Викторија Амелина (37) им подлегна на повредите здобиени по рускиот ракетен напад врз пицерија во источниот град Краматорск, кој се случи во вторникот на 27 јуни. Проектилот го погодил пица ресторанот во моментот кога таа била домаќин на вечерата организирана за група новинари и писатели од Колумбија. Писателката, која беше и истражувачот на воени злосторства е 13-то лице кое загина во нападот. Од Здружението на писатели ПЕН Украина соопштија дека лекарите „сториле сѐ што можеле за да ѝ го спасат животот, но повредите биле фатални“.
Амелина и десетици Украинци пред една година со воодушевување ја примија веста дека Македонија на украинската војска и испратила тенкови кои им помогаат во битката за спасување на татковината од руската агресија.
Пренесувајќи ја тогаш информацијата на 360 степени, на социјалните мрежи се изразуваше огромна благодарност до Македонија за помошта и за поддршката.
Особено впечатлива беше пораката на писателката, која на својот твитер налог не само што не го криеше своето задоволство туку и најави дека после победата над рускиот агресор, доколку преживее, Македонија ќе биде нејзината прва дестинација на која ќе го помине својот годишен одмор.