Коментирајќи го најавениот протест на опозициската ВМРО-ДПМНЕ закажан за 18 јуни, собранискиот спикер Талат Џафери посочи дека секој има право да протестира, но оти не може да да гарантира дека внатре во Собранието не можат да се повторат, како што рече, некои работи што се случиле во минатото
Секој има право да протестира, вели претседателот на Собранието Талат Џафери коментирајќи го најавениот протест на опозициската ВМРО-ДПМНЕ закажан за 18 јуни. Во таа насока, Џафери додава дека доколку протестот е надвор од зградата на парламентот, тогаш тоа не е надлежност на Собранието.
„По однос на најавите, сечие право е да протестира и да повика на протест. Надвор од Собранието не е надлежност на Собранието туку на институциите“,
рече Џафери на денешниот брифинг со новинарите, јави МИА.
Џафери, исто така, додаде и дека не може да гарантира дека внатре во Собранието не можат да се повторат, како што рече, некои работи што се случиле во минатото, јавува МИА.
Претходно минатата недела Извршниот комитет на ВМРО-ДПМНЕ донесе одлука за продолжување на активната блокада на Собранието која започна пред две недели, како и организација на голем народен протест на 18 јуни.
Молкот, велат од партијата, не е опција, а протест е за промени и подобар живот.
Оттаму додаваат дека ВМРО-ДПМНЕ нема да застане овде, односно дека ќе се разгледуваат и други понатамошни чекори, се додека не се организираат предвремени парламентарни избори.