Во својот состав, велат оттаму, Комисијата нема експерти по сите научни области за директно да ги разгледува пристигнатите ракописи за учебниците по разни научни области, а и да има, тоа не е нејзина надлежност и обврска, туку на наменски формирани рецензентски комисии и на Бирото за развој на образованието или Центарот за средно стручно образование
Национална комисија за учебници денеска преку писмено соопштение се огради од грешките кои беа детектирани во учебникот за петто одделние, посочувајќи дека законска обврска на комисијата е да ги разгледува стручните мислења доставени од рецензентски комисии и Бирото за развој на образование или Центарот за средно стручно образование, а не стручно вреднување на учебниците.
Седумнаесетчлениот состав на Комисијата, како што наведуваат оттаму, има задача да ги разгледуваат стручните мислења од надлежните тела и по нив да донесат одлука за добиена највисока оценка за доставен ракопис за учебник во конкретна област, што е воедно, додаваат од Националната комисија и одлука за избор на текст на учебник кој ќе се печати и ќе се употребува во основното или во средното и стручно образование.
„Националната комисија за учебници не ги анализира текстовите на предлог-учебниците. Комисијата, согласно со законот, е формирана и има обврска да ги разгледува и да одлучи дали доставените стручни мислења од рецензентските комисии и Бирото за развој на образование (БРО) или Центарот за средно стручно образование (ЦССО) по доставените ракописи за учебници ќе го прифати или нема да го прифати. Според Законот за учебници не е предвидено Националната комисија да има членови од сите поединечни области од предметите што се изучуваат во основните и средните училишта“,
стои во соопштението.
Во својот состав, велат оттаму, Комисијата нема експерти по сите научни области за директно да ги разгледува пристигнатите ракописи за учебниците по разни научни области, а и да имаат, тоа не е нејзина надлежност и обврска, туку на наменски формирани рецензентски комисии и на БРО или ЦССО.
„Имено, стручноста и експертизата за различни области ја имаат рецензентските комисии кои се формираат одделно за секој учебник, од членови кои се компетентни во конкретната научната област од која е учебникот, како што се математика, географија, историја, козметологија, биологија итн“,
велат од Националната комисија за учебници.
Како што појаснуваат од Комисијата, повикот за рецензенти се објавува од Педагошката служба. По извршениот избор се составува листа на избрани рецензенти од различни области и се доставува до Националната комисија за учебници.
„Од оваа листа, се формираат рецензентски комисии во состав од по три члена и тоа претседател на комисијата од редовите на универзитетските професори од наставничките факултети за наставниот предмет за кој е наменет учебникот и двајца рецензенти наставници од основно, односно од средно училиште за наставниот предмет за кој е наменет учебникот. По објавен конкурс од Педагошката служба за учебник по конкретен предмет, авторите ги доставуваат анонимно своите трудови – ракописи за учебници на разгледување до рецензентските комисии. Задача на рецензентска комисија е да ги проучи, разгледа и стручно да ги вреднува ракописите за учебници кои пристигнале согласно со Методологијата за вреднување на учебници, по што нивното стручно мислење го доставуваат на натамошно одлучување во Националната комисија за учебници“,
велат од Националната комисија за учебници.
Повикувајќи се на Законот за учебници, оттаму велат дека рецензентската комисија е одговорна за настанатата штета во случај учебникот да биде повлечен од употреба поради сериозни и очигледни грешки во стручното вреднување на ракописот за учебник.
Во врска со ракописот по предметот Историја и општество за петто одделние, од Комисијата велат дека мислењата што пристигнале до нив од Бирото за развој на образованието и рецензентската комисија биле позитивни, но со листа на забелешки и сугестии, коишто треба да бидат внесени од страна на авторите пред да се печати учебникот.
По ваквите мислења членот известител од Националната комисија на седницата одржана на 6 септември 2022 доставил негативно мислење во кое било наведено дека ракописот не ги исполнува условите за учебник и не се препорачува за печатење. Било предложено ракописот да биде вратен на повторно разгледување на авторите и во целост да се извршат корекции согласно со дадените забелешки.
„По ова во Националната комисија пристигнаа позитивни мислења за ракописот на учебникот од страна на БРО и на рецензентската комисија, во кои јасно е наведено дека во целост се извршени корекциите по забелешките и со кои беше предложено учебникот да биде печатен. По добивање на позитивните мислења со препорака за печатење на учебникот и водејќи се од нив, Националната комисија на седница на 27.10.2022 година донесе одлука за прифаќање на ракописот, односно за одобрување и употреба на учебникот“,
велат од Националната комисија за учебници.
Поради бројните грешки, учебникот по Историја и општество за петто одделение, чии автори се Анита Ангеловска и Гликерија Илиоска, предизвика бран реакции од страна на родителите на социјалните мрежи.
Во учебникот, чиј издавач е Министерството за образование и наука во Тема 2 – „Населението и за континентите“, е наведен податок дека највисокиот врв на светот, Монт Еверест на Хималаите, е висок 29 305 метри.
Очигледно беше дека до грешката дошло поради лош превод.
Монт Еверест е висок 29 305, ама не метри, туку стапки. Ако стапките се претворат во метри, се добива точно 8 849 метри.
Исто така, во Тема 2 – „Населението и континентите“, во делот каде што се опишуваат географските карактеристики на Македонија, наведено е дека земјава на исток се граничи со Република Албанија, а на запад со Република Бугарија.
По многуте реакции во јавноста грешките во учебникот, авторките Анита Ангеловска и Гликерија Илиоска преку социјалните мрежи дадоа објаснување дека тие биле технички, а оти не можеле да го прегледаат учебникот пред печатењето.
Ресорниот министер Јетон Шаќири, во врска со грешките изјави дека до почетокот на второто полугодие сигурно ќе се најде решение за спорниот учебник.
„Треба да се утврди дали освен овие забелешки кои досега беа пријавени има и други забелешки и да се утврди дали се тие технички или содржински. Ако се утврди дека во учебниците има помалку од 30 отсто грешки, тогаш ќе се коригираат и ќе се вратат во употреба. Ако има над 30 проценти грешки ќе заземеме став дека учебникот ќе биде повлечен“,
изјави пред десетина дена министерот Шаќири во гостување на Телевизија 24.