Двајцата кандидати за американски претседател во дебатата разменија аргументи и критики за абортусот, имиграцијата, војните во Украина и Газа, нивното управување со економијата, па дури го споменаа и своето играње голф
Американскиот претседател Џо Бајден и неговиот републикански ривал и противкандидат на претстојните претседателските избори во САД, Доналд Трамп, разменија неколку лични навреди во долгоочекуваната дебата што се одржа вчеравечер по локално време.
Дебатата, која се одржа во студиото на Си-ен-ен во Атланта, започна мошне студено бидејќи двајцата кандидати не се ни ракуваа пред да седнат на своите места.
Како што пренесуваат странските медиуми, впечатокот од дебатата е дека настапот на Бајден на моменти бил колеблив и неизвесен, додека Трамп започнал со серија вербални напади.
Двајцата кандидати за американски претседател во дебатата разменија аргументи и критики за абортусот, мигрантите, војните во Украина и Газа, нивното управување со економијата, па дури го споменаа и своето играње голф.
Настапот на Бајден, особено на почетокот на дебатата, ја искристализира загриженоста на многу Американци дека на 81 година тој е премногу стар за да биде претседател. Тоа предизвика нов круг повици до демократот да размисли за отстапување како партиски кандидат бидејќи членовите на неговата партија стравуваат од враќањето на Трамп во Белата куќа, пренесува „Гардијан“.
За време на дискусијата, како што пренесуваат медиумите, се чинеше дека Бајден почна повеќе да се фокусира на нападот на Трамп, меѓу другото, нарекувајќи го „криминалец“ поради неговото убедување за прикривање тајни плаќања на порноѕвездата Сторми Даниелс.
Бајден упати низа критики против Трамп поради неговите правни проблеми споредувајќи го моралот на неговиот претходник со „уличарка“ и нарекувајќи го „осуден криминалец“.
Како одговор, Трамп потсети дека синот на Бајден, Хантер, неодамна беше осуден за лажење за употреба на дрога со цел да купи оружје.
Запрашан за нападот на толпата негови приврзаници врз американскиот Капитол на 6 јануари 2021 година, Трамп одби да прифати каква било одговорност и тврдеше дека многу од уапсените се невини.
„Овој тип нема смисла за американската демократија“,
се потсмев одговори Бајден.
Бајден и Трамп разговараа и за правото за абортус, кое е едно од најважните прашања за демократите на овогодинешните избори.
Во однос ова прашања, како и она за мигрантите, Бајден го обвини Трамп дека овозможил укинување на правата за абортус низ целата земја со назначување конзервативци во Врховниот суд на САД. Трамп одговори дека Бајден не поддржува никакви ограничувања за абортусот тврдејќи дека враќањето на ова прашање во државите е вистинската работа.
Деведесетминутната дебата се одржа четири месеци пред изборите, што е најрано досега, а во студиото немаше публика и микрофоните автоматски им се исклучуваа кога не беше нивни ред за зборување. Тие меѓусебно се нарекоа „најлошиот претседател во историјата“, Бајден за Трамп кажа дека е губитник и плачко, додека Трамп му возврати дека е катастрофа.
Сепак, она што како главна тема за анализа, се наметна во медиумите е настапот на Бајден, кој се оценува како слаб и и неубедлив и предизвика грижа во редовите на демократите дали нивниот кандидат за претседател ќе успее на изборите во ноември да го освои вториот мандат.
Потпретседателката на САД, Камала Харис во изјава за Си-ен-ен и Ем-ес-ен-би-си ги повтори причините зошто гласачите треба да застанат на страната на Бајден. Таа и Гевин Њусок, гувернерот на Калифорнија, се обидоа да ги потсетат гласачите како беше за време на претседателствувањето на Трамп од 2016 до 2020 година и што може да се случи доколку тој повторно биде избран за претседател.
„Тоа беше бавен старт. Тоа е очигледно за секого. Нема да дискутирам за тој момент“,
рече Харис.
По ова, таа се осврна на достигнувањата на Бајден како претседател, како зајакнувањето на НАТО и отворањето на работни места посочувајќи дека Бајден се бори за народот, додека Трамп се бори за себе.
„Луѓето можат да дебатираат за стилот, но на крајот овие избори и кој е претседател на Соединетите Држави треба да се однесуваат на суштината. И контрастот е јасен“,
рече потпретседателката на САД.