Народното творештво не е чепнато со Преспанскиот договор. Значи, таму каде што е Македонија, таму нема никаква интервенција со тој политички договор, вели шефот на државата
Претседателот Стево Пендаровски не гледа ништо спорно во тоа што на концерт, по повод стогодишнината од раѓањето на легендарната Васка Илиева, ја потпевнувал песната „Земјо македонска“.
Деновиве на социјалните мрежи е вирална снимка на МРТ од посочениот настан, на која се гледа како претседателот Пендаровски, стоејќи, заедно со останатите гости во салата, ракоплеска и ги пее стиховите: „Никој не те плаши, Македонијо, на овој бели свет. Кој душман ќе влезе, жив нема да излезе, Македонијо, ти го ставаш в гроб“.
Луѓеееееее што доживеав. pic.twitter.com/9PWIkXyxyI
— Уништувач на лоботоми (@LMakedonecot) December 8, 2023
Тој, заедно со сопругата Елизабета Ѓоргиевска, бил гостин на свеченоста на покана на „Танец“. Шефот на државата единствено е зачуден зошто видеото масовно се споделува на социјалните мрежи сега, а концертот се одржал пред еден месец.
Пендаровски: Тоа се случи пред месец дена и концертот завршува со химната по која, претпоставувам, е најмногу препознатлива Васка Илиева, со таа песна, на која цела сала стана. Ме чуди што сега го објавуваат и гледам некои квазипатриотски центри критикуваат.
360°: Да, велат – претседателот не ја вика така државата во своите јавни настапи, го користи уставното име, а сега пее за Македонија.
Пендаровски: Инаку, за тие стручњаци да кажам, вие тоа го знаете, народното творештво не е чепнато со Преспанскиот договор. Значи, таму каде што е Македонија, таму нема никаква интервенција со тој политички договор. Но, нејсе, тоа е снимано од МТВ и емитувано е на државната телевизија. Ме чуди што сега го објавуваат тоа. Апсолутно неспорно е, една спонтана реакција, цела сала беше станата и сите ја пеевме таа песна која ни е практично во крвта, во вените, од најмлади години влезена и нема никаква врска со избори, со купување гласови, со додворувања, наводно патриотски. Тоа е една од најпознатите македонски песни и не можам да видам никакво политикантство во тоа.
Преспанскиот договор со кој земјава го смени своето уставно име од Република Македонија во Република Северна Македонија, стапи во сила 8 месеци по потпишувањето – на 12 февруари 2019 г.
Интегрално, Договорот може да го погледнете тука.