Владата денеска објави на кои проекти ќе се потрошат поголем дел од парите кои беа предвидени за изградба на карго аеродром од Штип. Од вкупно планирани 49 милиони евра, со владина одлука 35 милиони евра се прераспоредени за реализација на 99 инфраструктурни проекти во 75 општини.
Одлуката за прераспределба на парите е донесена по анализа дека нема економска исплатливост од карго аеродром во Штип.
„Според договорот со компанијата ’ТАВ‘ склучен во 2008 година и дополнет со 4 анекси, беше предвидено со 49 милиони евра да се изгради и карго аеродром. Промената е направена врз основа на анализа за проценка на економска оправданост од февруари 2020. Евентуалната позитивна разлика помеѓу проектираната и изведбената цена, ќе биде уплатена на посебна сметка на Генералниот секретаријат на Владата и парите ќе бидат наменети за чистење на линданот од кругот на фабриката ‘ОХИС’“,
рече портпаролот на Владата, Душко Арсовски.
Најмногу пари ќе добие Град Скопје, 6,6 милиони евра за два проекти: изградба на клучката кај Момин Поток и мостот „Карпош“.
Општините Шуто Оризари, Штип, Чаир, Струмица, Тетово, Кичево, Струга, пак, ќе добијат над 1,1 милион евра и тоа за:
- Шуто Оризари – 1,1 милион евра изградба на атмосферска канализација на 4 улици;
- Штип – 1,2 милион евра за изградба на линија 2 со резервоар „Мерите“;
- Чаир – 1 милион евра за реконструкција на дел од водоводните мрежи како и мрежите за канализација и фекални води;
- Струмица – 1,4 милиони евра за регулација на порој „Св. Илија“ на потег од базната преграда до сливот на река Водочница;
- Тетово – 1,1 милион евра за реконструкција на училиштето „Кирил Пејчиновиќ“ и изградба на патот „Благоја Тоска“;
- Кичево – 1,1 милион евра за реконструкција на Центарот на градот, капела кај православните гробишта, центар за кучиња скитници и блок А, Б, В и котлара;
- Струга – над 1 милион евра за изградба на неколку патишта.
Во продолжение погледнете го и деталниот преглед на проекти за секоја општина поединечно:
