Претседателот на Асоцијацијата, Васко Илијевски, како едно од решенијата ги посочи зголемените казни, но и вклучување во процесот на родителите или старателите доколку малолетникот е затекнат во објектите каде што се приредуваат игрите на среќа. Илијевски ја посочи и изработката на едукативни програми кои ќе им помогнат на играчите да ја разберат услугата која ја нудат понудувачите на игрите
Наместо дислокација на обложувалниците од училиштата на повеќе од 500 метри која е предвидена со измените на Законот за игри на среќа, претставниците на Асоцијацијата на спортски обложувалници на Македонија (АСОМ) предлагаат други решенија.
Претседателот на Асоцијацијата, Васко Илијевски како едно од решенијата ги посочи зголемените казни, но и вклучување во процесот на родителите или старателите доколку малолетникот е затекнат во објектите каде што се приредуваат игрите на среќа. Илијевски ја посочи и изработката на едукативни програми кои ќе им помогнат на играчите да ја разберат услугата која ја нудат понудувачите на игрите.
„Дистанцата е јасно дефинирана во членот 21 од Законот, каде што стои дека влез за малолетни лица е забранет. Законодавецот јасно предвидел кој може да учествува во игрите на среќа и сметаме дека тоа е доволна мерка која може да се подобри во оваа насока“,
посочува Илијевски.
Од Асоцијацијата уште еднаш побараа повлекување на Законот за игри на среќа, но упатија и барање за одржување на јавна дебата на сите надлежни институции, со цел да се донесе соодветно законско решение кое ќе овозможи соодветно функционирање на оваа дејност.
Предложените законски измени, како што велат од Асоцијацијата, ќе предизвикаат пораст на сивата економија, крах на една индустрија и играње игри на среќа на црно.
„Негативните ефекти ќе се одразат најмногу врз вработените и врз приходите во буџетот на државата, кои според нашата проценка се движат некаде преку 250 милиони евра на годишно ниво. Индустријата за игри на среќа вработува повеќе од 10 000 вработени директно, а индиректно преку 54 000 луѓе обезбедуваат приходи од работењето на оваа стопанска гранка“,
изјави претседателот на Асоцијацијата на спортски обложувалници на Македонија.
Предлог-законот кој предвидува измени на Законот за игрите на среќа и за забавните игри беше утврден минатиот месец. Со него се предвидува просториите во кои се приредуваат игрите на среќа да бидат оддалечени од училиштата не помалку од 500 метри.