Вака министерката за труд и социјална политика, Јованка Тренчевска го најави проектот насочен кон вработување на лицата со попреченост и нивна поголема инклузија на отворениот пазар на труд, за што се дискутираше на денешната сесија „Предизвиците во вклучувањето на лицата со попреченост на пазарот на трудот: европски практики и национални можности“
Наместо да бидат вклучени во системот на социјална заштита, приматели на социјална помош, да можат самостојно да обезбедуваат егзистенција за себе и за своите семејства.
Вака министерката за труд и социјална политика, Јованка Тренчевска го најави проектот насочен кон вработување на лицата со попреченост и нивна поголема инклузија на отворениот пазар на труд на денешната сесија „Предизвиците во вклучувањето на лицата со попреченост на пазарот на трудот: европски практики и национални можности“.
„Целта на оваа активност е проширување на можностите на вработување на лицата со попреченост и подигање на нивната инклузивност на пазарот на труд. Со воведување на новиот модел за вработување, целта е да се унапреди пристапот на лицата со попреченост до можностите за вработување и успешно да се придонесе кон подигање на нивната благосостојба“,
истакна Тренчевска и додаде оти проектот е технички помогнат од Светската банка, а оти ќе се имплементира преку воведување нова законодавна рамка.
Како што на почетокот на дискусијата истакна и Милева Ѓуровска, координаторката на Националната конвенција за ЕУ во РСМ, „во извештајот од Европската комисија во 2021 година е забележано дека државата треба да посвети посебно внимание на ефективно спроведување на активни мерки за вклучување на лицата со попреченост на пазарот на трудот, обезбедувајќи соодветна контрола и евалуација на мерките“.
Министерката Тренчевска во своето излагање истакна дека новиот модел на вработување на лицата со попреченост ќе се воведе следејќи ги регионалните и светските позитивни примери, а оти во земјава ќе се спроведе етапно, чекор по чекор.
Зголемената имплементација на лицата со попреченост на пазарот на трудот, меѓу другото, беше главна тема и на минатонеделната онлајн-дискусија „Премостување на јазот – вработување на лица со попреченост“, на која особена важност се придаде на „ослободувањето“ на лицата со попреченост од правниот лавиринт и нивно постепено транзитирање од заштитеното вработување, што преку поддржаното вработување би можело да им ги отвори вратите на отворениот пазар на труд.
Ова го истакна анализата на универзитетските професорки Наташа Богоевска и Сузана Борнарова што беше презентирана на минатонеделната дискусија „Премостување на јазот – вработување на лица со попреченост“, за унапредување на правата на лицата со попреченост на пазарот на труд.
Меѓу другото, еден од поважните аспекти кои беа презентирани во анализата на Богоевска и Борнарова минатата недела, беше тоа што законските регулативи кои се насочени кон лицата со попреченост може да не бидат импплементирани во целост врз сите лица за кои тие закони важат, поради терминолошката разноликост со која се соочуваат овие лица.
„Лица со пречки“, „инвалидни лица“, „лица со посебни потреби“, „лица со попреченост во развојот“, „лица со хендикеп“ се само дел од различните термини за ранливите групи граѓани во земјава.
Затоа, како што истакнаа професорките во својата анализа, за целосно спроведување на законите за оваа група на лица потребно е наоѓање и воведување унифициран термин, со кој соодветно ќе се претставува оваа група на граѓани, а притоа тој да не биде насочен кон нивна стигматизација и дискриминација.
