Лидерот на најголемата опозициска партија на Албанците во Северна Македонија изостави да ја честита независноста. Но, ги потсети „македонските владејачки елити“ дека државата не може да биде изградена без почитување на „етничкиот легитимитет“
Демократската унија за интеграција, која до скоро беше на власт речиси непрекинато во последниве две децении како коалициски партнер и на СДСМ и на ВМРО-ДПМНЕ, излезе со порака за Денот на независноста на Северна Македонија. Попрецизно, не партијата, туку лидерот Али Ахмети напиша неколку реченици на Фејсбук по повод 33-годишниот јубилеј, кои потоа беа споделени и на интернет-страницата на ДУИ.
Ахмети ја почнува пораката со предизвиците кои, според него, ги поминала државата и за тоа низ која призма на тие настани гледале Албанците.
„Пред 33 години Албанците се радуваа на одвојувањето од Југославија и ја креваа надежта за изградба на нова држава еднаква за сите. Но, тоа не се случи, новата македонска држава го продолжи српското наследство во Југославија, третирајќи ги Албанците како граѓани од втор ред. Ова доведе до војната во 2001 година и Охридскиот мировен договор“,
пишува Али Ахмети.
Дека Албанците поинаку го доживеаја прогласувањето на независноста говорат и историските факти. Тогашните партии на Албанците повикуваат на негов бојкот. Не поради желбата да се остане во југословенската федерација, туку поради правецот што го фаќа тогашната политичка елита во контекст на правата на Албанците.
Во својата порака, Ахмети не говори повеќе за војната во 2001 година. Но, во другите реченици по повод Денот на независноста јасна е неговата позиција дека во актуелната владејачка гарнитура гледа „моноетничка политика“. Лидерот на ДУИ, до крајот на пораката, пропушта да упати честитка.
„23 години подоцна, гледаме дека сè уште има тенденции за мајоризација, за непочитување на демократската волја на Албанците од страна на партијата што ја претставува мнозинската заедница, за нарушување на етничкиот легитимитет со цел да се создадат слуги кај Албанците за нивната моноетничка политика. Затоа, на оваа годишнина од независноста, ценам дека македонските политички елити треба да бидат свесни за големата одговорност што ја имаат во градењето на државата, почитувајќи ја политичката волја на Албанците и еднаквоста, бидејќи оваа држава ни припаѓа на сите нас и не може да биде изградена без почитувана етничка легитимност“,
пишува Али Ахмети на неговиот фејсбук-профил.
Реториката во пораката на Ахмети е во духот на позициите на партијата во последниве месеци, односно откако ВМРО-ДПМНЕ како победник на изборите во мај одлучи за владин партнер да ја покани коалицијата „Вреди“, а не коалицијата која ја предводеше ДУИ – „Европски фронт“. Оттогаш ДУИ обвинува дека е повредено правото на Албанците за политичко претставување во институциите на системот во духот на Рамковниот договор.
„Вреди“, пак, тврди дека коалицијата околу ДУИ освоила повеќе гласови затоа што со нив биле и партии на Турците, Ромите и Бошњаците. ВМРО-ДПМНЕ ги отфрла тезите на Ахмети бидејќи токму ДУИ го наруши принципот победник со победник, кога во 2017 година реши да не коалицира со ВМРО-ДПМНЕ, која победи на тогашните избори, туку со СДСМ.