Министерот за здравство Беким Сали рече оти оваа одлука не е конечна затоа што, како што нагласи, состојбата со новозаразени ќе се следи во идниот период и соодветно на тоа ќе се носат препораки и одлуки
Комисијата за заштита од заразни болести препорача периодот на изолација за лицата позитивни на ковид-19 да се намали од десет на седум дена, изјави денеска министерот за здравство Беким Сали.
Тој за ТВ Сител изјавил оти седницата била свикана врз основа на следењето на трендот на одлуки кои се носат во различни држави кои се земаат за пример, но и врз основа на Институтот за јавно здравје кој на дневна база ги добива податоците околу состојбата со вирусот во земјава.
„На денешната седница која беше свикана по барање на министерот за здравство, членовите на Комисијата одговорија позитивно и се состанавме. На тој состанок се разговараше, и секако врз основа на следењето на трендот на одлуки кои се донесени во различни држави, кои се релевантни и се земаат за пример за споредување, и врз основа на нашиот Институт за јавно здравје кој ги добива на дневна база податоците, одлуката на Комисијата е изолацијата од десет дена да се намали на седум дена“,
изјави Сали за ТВ Сител.
Сали напомена дека оваа одлука не е конечна, затоа што, како што рече, состојбата со новозаразени ќе се следи во идниот период и соодветно на тоа ќе се носат препораки и одлуки.
Оваа препорака на Комисијата треба да се најде на Кризен штаб во понеделник, а во вторник веќе треба да се најде на владина седница.