Според изјавите на официјални лица, шест од загинатите се во регионот на Криви Рог, а еден во Киев. Меѓу загинатите во централниот украински град Криви Рог се и две девојчиња на возраст од пет и 12 години. Најмалку осум лица се повредени
Најмалку седум лица, меѓу кои две деца, загинаа за време на масовен руски ракетен и беспилотен напад врз Украина извршен во текот на ноќта. Украинската војска пријави повеќекратни напади со ракети и беспилотни летала низ целата земја, особено насочени кон централна Украина.
Според изјавите на официјални лица, шест од загинатите се во регионот на Криви Рог, а еден во Киев. Меѓу загинатите во централниот украински град Криви Рог се и две девојчиња на возраст од пет и 12 години.
„Во село на периферијата на Криви Рог, директен напад со балистичка ракета ‘искандер-М’, лансирана од Воронеж, погоди приватна куќа каде што живеело големо семејство, при што загинаа девојчиња на возраст од пет и 12 години и четири возрасни лица“,
изјави началникот на Воената администрација на Криви Рог, Олександр Вилкул.
Тој додаде дека уште осум лица се повредени, а дека бројот на жртви би можел да се зголеми.
Градоначалникот на Киев, Виталиј Кличко, потврди еден смртен случај и пожари на повеќе области во главниот град. Експлозии се слушнале и во Лавов, каде што се пријавени оштетувања на станбени згради.
Украина ја очекуваше руската офанзива, а украинскиот претседател Володимир Зеленски вчеравечер предупреди дека постои голема веројатност таа да се случи во текот на ноќта. Во објава на социјалните мрежи, тој рече дека Русите подготвуваат масовен напад и апелира граѓаните да останат безбедни.
„Важно е нашите партнери да разберат што се случува и да знаат дека заштитата на животите директно зависи од нивната подготвеност или неподготвеност да ни помогнат со ракети за воздушна одбрана. Ова главно се однесува на САД и оние партнери кои имаат ракети ‘Патриот’ и можат да ги обезбедат за да ја поддржат нашата одбрана“,
напиша Зеленски на социјалните мрежи.
Како одговор на нападите во Украина, соседна Полска мобилизира борбени авиони како превентивна мерка.