Под мото „Протест против уништувањето на ноќните клубови“ на социјалните мрежи се најавува протестен марш во знак на револт од забраните за работа и, како што се посочува, недостигот на мерки за финансиска помош за излез од кризата.
Протестот се најавува за в среда пред владината зграда, а на него ќе се бара финансиска поддршка од државата за ноќните клубови кои поради ковид-19 со месеци имаат забрана за работа.
„Седум месеци сме присилно затворени без ниту еден работен ден. Седум месеци со лични задолжувања за трошоци (кирии, плати и паушали) за опстанок на ноќните клубови. Седум месеци со 0 денари помош од државата. Без одговор на писменото барање до Владата за состанок со претставници од власта за решавање на нашето прашање како најпогодени од целата ситуација. Дали сме само граѓани на оваа држава кога плаќаме даноци и лиценци за работа? Протестираме за добивање на финансиска поддршка која би требало да следува како едни од најпогодените во целата ситуација! Протестираме за дискриминацијата спрема нас во ова ‘еднакво правно општество’. Протестираме за нашето основно граѓанско право – право на работа“,
се вели во повикот за протестот.
Најавите за протест доаѓаат истовремено со новите мерки од Владата за рестрикции во угостителството. Со нив, меѓудругото, се забрануваат настапи на пејачи и диџеи во угостителските објекти, се намалува бројот на лица што можат да седат на иста маса и се ограничува максималното ниво на бучава во угостителските објекти на 55 децибели.
Во владиното соопштение беше посочено и дека Владата го прифати и укажувањето на Комисијата за потребата од строго почитување на забраната за работа на ноќни барови и дискотеки и потребата од преземање ригорозни мерки од страна на надлежните институции во случај на прекршување на забраната.