Повеќе од 800 илјади лица се попишани откако почна процесот на попишувањето до денеска. Како што соопштуваат од Државниот завод за статистика, попишани се 249 500 домаќинства и 336 109 стана до вчера до 20 часот.
Можноста за самопопишување на лица во странство, пак, досега ја искористиле вкупно 193 168 лица.
Пописот на населението, домаќинствата и становите во С Македонија, кој официјално започна на 5 септември, ќе трае до 30 септември.
Во април пописот беше одложен за овој месец поради тогашниот трет ковид-бран.
Од Државниот завод за статистика веруваат дека попишувањето од епидемиолошка смисла е безбедно бидејќи сите попишувачи се должни да носат маски на лицето, да одржуваат растојание од граѓаните и редовно, пред и по секое попишување во домаќинствата, мора да ги дезинфицираат рацете и лаптоп-уредите.
Граѓаните имаат право, доколку сакаат, да побараат во нивното домаќинство да дојде вакциниран попишувач.