Заклучно со денеска, околу 54 илјади лица доцнат со пријава во евиденцијата на невработени лица, кои од утре имаат рок од 30 дена да го направат тоа или ќе бидат избришани од евиденција
Во земјава најмногу се бараат општи, градежни работници, хигиеничари, келнери…
Од почетокот на пандемијата, 19 174 лица се евидентирани како невработени. Ова е бројка на лица чија одјава од задолжително социјално осигурување е со датум во периодот од 11 март 2020 до 31 јануари 2021 година.
Тие се сега дел од 158 681 невработено лице, кои се активни баратели на работа и 90 193 пасивни баратели на работа.
Што најмногу се бара?
Во земјава најмногу се бараат работници за едноставни работи на производствена линија, општи работници, хигиеничари, продавачи, програмери, келнери и шанкери, шивачи, возачи на камион, обезбедувачи за заштита на лица и имот, ѕидарски, армирачки, тесарски работници…
Според директорот на Агенцијата за вработување Абдуш Демири, ова се најголем број од огласите што ги добиваат.
На веб-страницата на Агенцијата за вработување на дневна основа во просек има активни конкурси и меѓу 6 000 до 7 000 слободни работни места, каде што Агенцијата се јавува само како посредник.
Го губат статусот со непријавување
Уште еден проблем што го лоцираат од Агенцијата во однос на невработените е тоа што тие не се пријавуваат навреме, било како активни или како пасивни баратели на работа и со тоа го губат статусот.
Заклучно со денеска, на пример, околу 54 илјади лица доцнат со пријава во евиденцијата на невработени лица.
Сите тие од утре, па во наредните 30 дена треба да ја регулираат својата обврска – за активните баратели на секои 30 дена, додека за пасивните на шест месеци.