Во врска со последиците од тоа што Москва ја стави нашата земја на листата на непријателски држави, шефот на дипломатијата изјави денеска дека нашиот однос кон Руската Федерација во однос на воената агресија ќе се координира со членките на ЕУ, како и со НАТО и другите организации во кои припаѓаме
Премиерот Димитар Ковачевски, на денешната средба со евроамбасадорот Дејвид Гир, ја потврди позицијата на Северна Македонија, во согласност со позициите на нашите стратешки партнери ЕУ, НАТО и САД, за најостра осуда на руската инвазија на Украина и поддршка и придружување на санкциите кон Руската Федерација.
На состанокот, на кој присуствувал и вицепремиерот за европски прашања, Бојан Маричиќ, е поздравено лидерството на Владата и брзата реакција за ситуацијата во Украина, соопштуваат од владината прес-служба.
На средбата, како што се наведува, е заеднички истакната важноста на европските перспективи на Северна Македонија, што ќе значи охрабрување за европерспективите и на сите други држави од Западен Балкан.
Ковачевски, како што се наведува, рекол дека, на домашен план, Владата е фокусирана кон поддршка на животниот стандард на граѓаните и на компаниите и во насока на надминување на предизвиците од енергетската ситуација.
Во врска со односите со Бугарија, Ковачевски истакнал дека разговорите на премиерско ниво и меѓу членовите на работните групи се поставени на достоинствено ниво, со цел постигнување логички решенија врз база на меѓусебно почитување и разбирање. На состанокот е разговарано и за значењето на имплементацијата на европските проекти финансирани со европски пари, за што е констатирано дека е потребно одговорно однесување на локално ниво и од надлежните органи и институции.
Шефот на дипломатијата, Бујар Османи, на денешниот брифинг, одговарајќи на прашање во однос на последиците од тоа што Москва ја стави нашата земја на листата на непријателски држави рече дека нашиот однос кон Руската Федерација во однос на воената агресија ќе го координираме со членките на ЕУ, како и со НАТО и другите организации во кои припаѓаме.
„Се разбира, доколку имаме податоци за нарушување на Виенската конвенција, на правилата на однесување, ќе постапиме и билатерално, меѓутоа, во однос на политичките пораки што би ги пратиле до Руската Федерација, сите тие одлуки ќе ги донесеме заедно во координација со ЕУ“,
рече Османи.
Османи посочи дека Северна Македонија целосно се приклучи на санкциите што ги воведе ЕУ и оти сите наши активности во однос конфликтот ги координираме со ЕУ или со НАТО, пред се со ЕУ, односно не преземеме билатерални мерки како и повеќето земји коишто се или членки на ЕУ или кандидати.