Фармацевтската компанија „Џонсон и Џонсон“ официјално побара дозвола за итна употреба на нејзината вакцина против ковид-19 од Американската агенција за храна и лекови (ФДА), јавува Си-ен-ен.
Ако биде одобрена, таа ќе биде трета вакцина што ќе се користи во САД, по тие на „Фајзер“ и „Модерна“. По барањето на компанијата за регистрација на вакцини, на регулаторите ќе им треба време да ги анализираат податоците и состанок на советодавниот комитет. Процесите на одобрување на претходните две вакцини траеја три односно две недели.
Барањето на компанијата следува по извештајот од 29 јануари, во кој се вели дека глобалното клиничко тестирање од фаза 3 покажало оти ефективноста на оваа вакцина во спречување на умерено и тешко заболување од коронавирусот е 66 проценти.
За разлика од вакцините на „Фајзер“ и „Модерна“, кои се даваат во две дози, вакцината на „Џонсон и Џонсон“ не бара втора доза или транспорт на ниски температури. Вакцината користи аденовирус тип 26 за да инјектира коронавирусни протеини во клетките на телото и да предизвика имунолошки одговор.
САД имаат договор за купување на 100 милиони дози од оваа вакцина за милијарда долари, со можност за набавка на уште 200 милиони дози.
Компанијата „Џонсон и Џонсон“ соопшти дека е подготвена да достави вакцини веднаш по одобрувањето и планира да испорача една милијарда дози во 2021 година, кои би се произвеле во САД, Европа, Јужна Африка и Индија.