Дежурните екипи на „Македонија пат“ ги чистат патните правци со 172 товарни возила, а од Центарот за управување со кризи информираат дека патот од селото Велебрдо до селото Битуше до влезот на селото е замрзнат и претставува опасност на возилата што го употребуваат тој правец
По првите обилни врнежи на снег во земјава, од ЈП „Македонија пат“ информираат дека до 18 часот забрана за сообраќај на тешки товарни возила има на повеќе правци – Стража, Маврово, Ѓавато, ГП Ќафасан, ГП Јажинце, Плетвар, Демир Капија – Миравци и Струмица-Берово. На патниот правец Тетово-Попова Шапка, пак, има забрана за сообраќај за автобуси, додека за другите возила е задолжителна зимска опрема. На одредени патни правци кои поминуваат низ клисури и усеци можна е појава на поситни одрони.
„Апелираме на внимателно управување со возилата, почитување на поставената сообраќајна сигнализација, како и приспособување на брзината кон условите на патот“,
велат од „Македонија пат“.
Од Центарот за управување со кризи информираат дека по известување од Регионалниот ЦУК Тетово, во 17:35 часот, по добиеното известување од единствениот број за итни случаи 112 во ЦУК, патот од селото Велебрдо до селото Битуше до влезот на селото е замрзнат и претставува опасност на возилата што го употребуваат тој правец. Претставник од Општина Маврово-Ростуше известил дека екипи од Општина Маврово-Ростуше двапати имаат интервенирано по тој правец, дека патот бил прооден, но дека ја следат состојбата и повторно ќе излезат на терен за чистење на патот. Дополнително, од ЦУК информираат дека во одредени села во Општината има прекин во снабдувањето со електрична енергија.