Стапката на инфлација годинава е предвидено да изнесува 2,1%, што претставува одредено интензивирање на инфлацијата во однос на 2020 година, и е ревидирана нагорно во однос на првичната проекција (1,5%)
Во собраниската Комисија за финансирање и буџет, на 1 јули, почнува расправата за ребалансот на буџетот за 2021 година. Расправата во матичната комисија трае десет дена – период во кој, вообичаено, не се одржуваат пленарни седници, а пратениците имаат можност да поднесуваат амандмани на владиниот предлог-ребаланс, за чие донесување на крајот одлучува собранискиот пленум.
Според објаснувањето на Владата, ребалансот на буџетот е предложен, меѓу другото, поради потребата за обезбедување на средства за спроведување на активностите предвидени со петтиот и шестиот сет мерки.
Вкупните приходи со измените и дополнувањата на буџетот за 2021 година се планирани на ниво од 222,6 милијарди денари и се за околу 10 милијарди денари или за 4,7% повисоки во однос на иницијалните проекции на буџетот. Проекциите за приходите, како што се наведува во ребалансот, се базираат на реализацијата на приходите во тековната година, очекувањата за економските остварувања во 2021 година, одредени измени во даночната сфера, поголем даночен опфат, фер и олеснети административни процеси.
Вкупните расходи се планирани на ниво од 268,8 милијарди денари или се за 8,6%, односно за околу 21,3 милијарди денари, повисоки во однос на планот. Врз основа на вака планираните приходи и расходи, дефицитот е позициониран во износ од 46,2 милијарди денари, односно 6,5% од БДП.
Проектираниот дефицит за 2021 година, отплатата по основ на главница на надворешен долг во износ од 37,2 милијарди денари и отплатата на домашен долг во износ од 6,1 милијарди денари ќе се финансираат преку задолжување во странство и на
домашниот пазар на државни хартии од вредност. Отплатата на главница по основ на надворешен долг го вклучува редовното сервисирање на обврските по надворешниот долг, вклучително и отплата на еврообврзница издадена во 2014 година во износ од 500 милиони евра, додека отплатата на домашен долг ги опфаќа отплатите на државни обврзници во износ од 4,68 милијарди денари и отплата на структурни обврзници во износ од 1,44 милијарда денари.
По падот во 2020 година, економијата се очекува да заздрави во 2021 година, при што растот е проектиран на 4,1%, колку што изнесуваше и со првичниот буџет, но со одредено приспособување во однос на структурата на растот, односно поголем позитивен придонес на домашната побарувачка, при нагорна ревизија на проекциите за раст на потрошувачката и инвестициите, но и поголем негативен придонес на нето-извозот врз економскиот раст, како што наведуваат од Владата.
Стапката на инфлација во 2021 година е предвидено да изнесува 2,1%, што претставува одредено интензивирање на инфлацијата споредено со 2020 година, и е ревидирана нагорно во однос на првичната проекција (1,5%), при нагорна корекција на проектираниот раст на цените на примарните производи на светските берзи, како што се нафтата, пченицата и пченката, и нагорно придвижување на странската ефективна инфлација.
Дефицитот на тековната сметка на платниот биланс се очекува да се стесни на 3% од БДП во 2021 година, што главно е резултатна проектираното зголемување на приватните трансфери од странство, во услови на постепено намалување на негативните ефекти од пандемијата.
„Основното макроекономско сценарио е придружено со ризици, кои главно се поврзани со долготрајноста и последиците на здравствената криза. Ризиците во однос на проектираната динамика на инфлацијата главно се поврзуваат со високата неизвесност во поглед на ценовните движења на примарните производи на светските берзи’,
се наведува во предлог-ребалансот, што од следната седмица е на расправа во парламентот.