Државјанин на Албанија е приведен под сомнение за предизвикување пожар во близина на Гостивар, додека едно лице е осомничено за пожарот во Старо Нагоричане
Полициски службеници од Галате попладнево го лишиле од слобода Л.А. (32) од Албанија, кој илегално престојувал во земјава, под сомнение дека подметнал пожар над гостиварско Пожаране. Како што соопштуваат од МВР, тој ќе биде задржан за понатамошна постапка.
Како што информираат од МВР, едно лице е осомничено и за пожарот во Старо Нагоричане и полициските службеници веќе постапуваат во координација со јавен обвинител.
„Во текот на вчерашниот ден, пак, благодарение на брзата интервенција на полициска патрола и на екипа на Бригадата за противпожарна заштита – Скопје спречен е пожар од поголем размери пред село Блаце кон Катланово, за кој две лица се под сомнение за негово предизвикување и се работи на расчистување и на овој случај“,
соопшти МВР.
Од МВР апелираат строго да се почитува забраната за движење во шумските предели, а граѓаните максимално да се воздржат од палење огнови, отпадоци, меѓи и стрништа на нивите, да не фрлаат неизгаснати догорчиња и да не оставаат стаклени шишиња или други предмети, кои можат да предизвикаат пожар ако се подолго време изложени на сонце.
-Неопходна е максимална будност и целосно одговорно однесување на секој поединец. Потсетуваме дека предизвикувањето на пожар намерно или од невнимание претставува кривично дело, кое се санкционира со соодветни поднесоци и за кое е предвидена и затворска казна до 8 години (член 227 од Кривичниот законик), зависно од видот на пожарот и другите околности и последици, велат од МВР.