Министерот за внатрешни работи, одговарајќи на новинарско прашање, денеска изјави дека МВР ги презема сите потребни дејствија во врска со случајот
Министерството за внатрешни работи сè уште не ги пронашло сторителите кои во петокот доцна вечерта го нападнаа претседателот на Фудбалската федерација на Македонија (ФФМ), Муамед Сејдини.
Ова денеска го потврди министерот за внатрешни работи Панче Тошковски одговарајќи на новинарски прашања по отворањето на Регионалниот центар К9 во Полицискиот центар „Ѓорче Петров“.
„Постапено е од Министерството за внатрешни работи во однос на предметниот случај. Министерството за внатрешни работи ги презема сите потребни дејствија, веднаш е одговорено по добиена пријава за конкретниот настан и се постапува“,
рече Тошковски.
На дополнително прашање дали се откриени напаѓачите, министерот за внатрешни работи изјави:
„Сè уште не можам да одговорам позитивно на вашето прашање“
Претседателот на ФФМ, Сејдини, во петокот доцна попладнето беше нападнат од неколку непознати лица пред угостителски објект во Скопје, каде што бил на состанок.
„На 27.09.2024 во 18.40 часот М. С. (55) од Кичево пријавил дека пред угостителски објект во Скопје бил физички нападнат од неколку лица, кои при нападот немале маски на главите, по што се оддалечиле. Се преземаат мерки за пронаоѓање на напаѓачите и за расчистување на случајот“,
информираа во петокот од Министерството за внатрешни работи.
Нападот остро го осудија од Фудбалската федерација на Македонија нарекувајќи го кукавички и срамен. Според ФФМ, ваквиот чин на насилство претставува директен удар врз вредностите на фудбалот, спортот и демократијата, воопшто.
Оттаму рекоа дека нема да дозволат насилството да стане средство за влијание и додаваат дека изборот на раководни лица во Федерацијата се одвива преку легални и демократски процедури, со гласови на делегатите, а не со закани и насилство. Посочуваат оти Муамед Сејдини на оваа позиција е избран на легален начин и дека на истиот начин ќе го заврши или продолжи својот мандат како претседател на ФФМ.
Осуда за нападот стигна и од Демократската унија за интеграција (ДУИ) од каде што изразија загриженост дека овој случај треба да биде силен аларм оти меѓуетничките тензии во земјата се зголемени.