Делото за кое е осомничен, како што се наведува во пријавата, ексминистерот за внатрешни работи го сторил на начин што во законски предвидениот рок не донел решение за одземање на овластувањето за вршење технички преглед врз основа на предлогот кој бил доставен од надлежна организациска единица за граѓански работи
Министерството за внатрешни работи поднесе кривична пријава против против ексминистерот за внатрешни работи Оливер Спасовски поради сомнение за злоупотреба на службената положба и овластување.
Според кривичната пријава поднесена до ОЈО Скопје, додека ја вршел министерската функција, во текот на 2021 година, Спасовски ја искористил својата службена положба и овластување и на фирма за технички преглед во скопски Сарај ѝ овозможил да се стекне со противправна имотна корист во износ од 5,5 милиони денари.
Делото за кое е осомничен, како што се додава во пријавата, Спасовски го сторил на начин што во законски предвидениот рок не донел решение за одземање на овластувањето за вршење технички преглед врз основа на предлогот кој бил доставен од надлежна организациска единица за граѓански работи.
„Иако знаел дека рокот за донесување решение за одземање на овластувањето е најдоцна до 15 дена од денот на доставување на предметот, не ја извршил својата службена должност согласно чл. 65 ст. 3 од Законот за возила и чл. 5 од Правилникот за начинот и постапката за донесување и одземање на решението за овластување на правното лице за технички преглед на возила и за категории на возила за кои се издава овластување за технички преглед на возила“,
наведуваат од МВР.
Иако во пријавата изрично не е наведено, извесно е дека станува збор за фирмата „Виа комерц“ од скопски Сарај, односно за постапката за одземање на дозволата за работа поради претходно утврдени неправилности.
Во станицата за технички преглед на „Виа комерц“ во октомври 2021 година на контрола поминал и автобусот на компанијата „Беса транс“ кој на 23 ноември истата година учествуваше во трагичната сообраќајна несреќа на автопат во Бугарија во која загинаа 45 македонски државјани. Три дена по трагедијата, на 26 ноември 2021 година, тогашниот министер за внатрешни работи Оливер Спасовски потпишал решение за привремена забрана за работа на станицата поради констатирани пропусти во работењето.
„360 степени“ непосредно по трагедијата објави дека пропустите во станицата биле утврдени три и пол месеци претходно. Според официјален записник, овластени лица од МВР спровеле надзор во станицата на „Виа комерц“ на 12 август 2021 година. При надзорот, биле констатирани серија неправилности, поради што надлежните служби во Бирото за јавна безбедност на 25 август 2021 година донеле предлог за забрана за работа, со рок од 30 дена во кој станицата треба да ги отстрани пропустите. Но, решението за забрана за работа не било потпишано од страна на министерот, па станицата на „Виа комерц“ продолжила непречено да работи.
По истражувањето на „360 степени“, Обвинителството за гонење организиран криминал и корупција (ОЈО ГОКК) покрена предистражна постапка за случајот. На брифинг со новинарите во март минатата година, од ОЈО ГОКК соопштија дека случајот со „Виа комерц“ е затворен со резолуција уште пред неколку месеци.
Од ОЈО ГОКК посочија дека предметот бил во насока да се докаже штета од постапувањето на министерот Оливер Спасовски. Биле побарани и докази и вештачења од Бугарија, од кои било утврдено дека причина за несреќата не е неисправност на автобусот, што би значело дека работењето на „Виа комерц“ не довело до штета во врска со конкретниот настан.